Nimin khan School Education Department, Govt. of Mizoram leh North-eastern Education Development Finance Corperation Ltd. (NEDFi) te chuan Directorate of School Education Conference Hall, Aizawlah thawhdunna thuthlung an ziak. He thawhdunna thuthlung ‘Advancing North East Initiative for Career Mentoring of Students’ hnuaia ziahna hun hman hi School Education Minister, Dr. Vanlalthlana chuan khuallian niin a hmanpui.
He hunah hian khuallian chuan, Department leh NEDFi-te thawhdunna chu Mizoram zirna atana rahbi pawimawh tak a nih thu sawiin, thawhhona chuan Mizorama zirlaite tan hma hun eng zawk a thlen bakah, thalaite tan beiseina thar a thlen ngei a rin thu a tarlang a. Hei bakah hian thawhdunna a lo hlawhtlin leh zual theih nan offficial-te chu theihtawp chhuah zui turin a ngen nghal a ni.
He hunah hian David Lalthantluanga, Special Secretary, School Education Department chuan inlawmna thu sawiin program neih chhante a sawizau a. S.K. Baruah, Executive Director, NEDFi-in Advancing North-east Initiative sawifiahna hun tawi a hmang a. Hemi hnu hian PVSLN Murty, CMD chuan NEDFi-in Advancing North-east kaltlanga zirlaite a kaihhruai dan (student mentoring) chungchang kalkhawmte hmaah a sawifiah a. Thawhdunna thuthlung hi Mizoram aiawhin Lalsangliana, Director, School Education Department, Samagra Siksha State Project Director ni bawk leh NEDFi aiawhin SK Baruah, Executive Director te chuan an ziak a ni.
He Thawhdunna Thuthlung hnuaiah hian, Mizoram a zirlai, Higher Secondary School chinte chuan, an zir zel dan tur chungchanga kaihhruaina an dawng thei dawn a. Advancing North-east Portal kal tlangin hriattur pawimawhte chu en theih a ni ang a. School tin atangin zirtirtu ruat bikte kal tlangin zirlaite kaihhruaina chu kalpui tum a ni. Thawhdunna Thuthlung kimchang chu a hnuaia Document-ah hian hmuh theih a ni e.