- Lallunghnema, Charity Lodge
Chhiartute chibai ka bûk a che u.
Tun tumah hian Mizo nu pakhat consumer justice a mi huaisen leh tum ruh,chhuanawm tak chêt velna chanchin ngaihnawm tak kan ngaithla ho dawn a ni.
‘Consumer’, tih reng mai pawh hi ka nin châng a awm thin. Mahse, mipui rawngbawlna pakhata ka ngaih avangin ka ‘kawnsumar’, lo thei lo a ni! Heti teh hrepa helam kawnga ka han inhmang ta chiam mai hi mak pawh ka inti reng a ni. Kan thianpa tawngkam ang deuhin kan ti ta sa sa a, kan ti zel mai ang chu.
Hei,kan ti nek nek a September kan chuang kai ta reng mai. Kumin chu ka tei kual nasa ve hle! Consumer Right ka vah vaihpui a ta langin Sangau, Phawngpui Tlang, Thaltlang, Tuipang te chuanin ka han hawi kual ve thuak thuak a. Tv- ah te ka lang ve zeuh zeuh bawk. Thu pawh ka la ziak thei reng.Ka tluang hle a,ka lawm hle a,ka Pathian hi a tha em a, bahlah ka nei lo hi ka lawmna tipungtu a ni. Pathian hnenah lawmthu ka sawi mawlh mawlh thin. Consumer te harsatna pawh ka ngaithla thin a,buaipui thei a ka awm phei hi chu ka lawmna pawh a thukin a ril a,a sang hle bawk a ni.
Consumer Awareness hmanrua atan CONSUMER WHATSAPP GROUP kan siam a.Tunah hian za ruk chuang kan ni tawh.Member a tam thei ang ber seng luh kan tum a ni.
Tûk khat chu dawr lian takah hian ka leng lut a. He dawr hi ka len luh fona a ni a, ka ngam pa ve khawp mai thin a. He dawra thawk nu pakhat a hming, Pi Rini chuan heti hian min zawt ta thut mai a.
Rini : Khulai lawkah khuan vai dawr pakhatah Zarda MRP aia sangin min lei luih tir a. Zarda hi 1 bundle Rs 2800/- in min lei tir a ; MRP chu Rs 2750/- a ni si a. Ka lawm lo khawp mai.
Keimah : Chuti chu Cash Memo i nei em? Cash Memo i neih chuan kan buai pui dawn nia. Cash Memo i neih loh chuan thil tih a buai thlak deuh ang.
Rini : Cash Memo chu ka nei alawm! Hei hi a nia! (Cash Memo chu a lo phawrh a….)
Keimah : Khawi ka lo kawl tha ang e, ka tih ve leh chuan min pe a.
Rini : Vai dawr a ni leh nghal a…. Engah mah min ngai lo….
Keimah : Ka remchân ve leh ka lo um zui dawn nia.
Rini : Pawisa tlem te pawh ni se, MRP aia sang a min leitir kha ka haw hrim hrim a ni.
He Mizo nu hi ka rin aiin a fel a, a fing a, a huaisen bawk. Chu Dawrah chuan amah ngei a zu kal leh a, tih dan tura ka tih ang khan a zu ti a, MRP aia sanga thil hralh hi Consumer dan kalh a nih dante a zu sawi a. MRP aia sanga an thil hralhna pawisa cheng 50(sawm nga ) chu an lo pe kir leh ta a ni. Pi Rini hi a lâwm hle a. Phone in a hlawhtlin thu hi lâwm takin min hrilh a ni. Pi Rini hi Sihphir khua a ni a. Sihphir atangin nitin dawra thawk turin Treasury Square -ah a lo kal thei a. A huat thu ni lo se, han en mai chuan fing vâr em em turah pawh ka ngai lo, mahse consumer right a hria a, a changkang tlat a ni. Kei pawh hian Consumer Right Awareness veitute hi ‘changkang’ ka ti thin. Consumer Right hre map lo, intichangkang ho hi ka ngaisang thei lova,ka ngai nêp a,ka khawngaih tel bawk.
Pi Rini ang hi Mizo nu kan mamawh. Mahni dikna leh chanvo humhalh na châng hria Mizo nu an tlem si! tih tur lah a tam si!
A tawp kan khar hmâin thu bengverh tak ka han hlui dawn che u a ni.
Centre For Consumer Education hian CONSUMER WatsApp Group leh Centre For Consumer Group kan siam ve a.A lûn ta hle mai! Member pawh za ruk chuang kan kai ta!1000 kan tlin thuai kan beisei.Heng CFCE hruaitute hi biak râwn theih reng an ni e
- Hnêma-9862288182
- Hnûna-9862406215
- Sangpuia-8131977751
- Dr Maria-8257040390
- Dr Nghinglova-8575051577
I lungawi lohna chu ngawih pui mai mai suh.