Inrinni zan khan English Premier League 2024-25 khelh chhunzawm a ni a, Mimuala chak Liverpool chu hmahruaitu thar an ni. Inrinni zana inkhel dangah Manchester City an chak zawh loh vangin Reds hian EPL-ah hma an hruai lailawk a ni ngawt tawh lova, hmahruaitu dik tak an ni tawh.
- A chung berah Reds
Manager thar Arne Slot hnuaia khel tha chho tak Liverpool hi table mawngphaha awm mek Wolverhampton Wanderers hmachhawn turin Molineux Stadium-ah an lenglut. An lenluhna mualah an khel tha thawkhat viau a, penalty atanga Mohamed Salah goal thun hmanga hnehna changin point thum hlu tak an hmu.
Reds hian mikhual an nihna mualah goal an chhuah hmasa teuh hle. Inkhel tan tirh lamah Wolves in hlauhawm an siam nghal a, si nghal Alison-a’n a chhanhim hlauh thung. Goal an chhuah tep hnuin Reds an khel tha nghal a, hlauhawm takin an khingpuite an nawr nghal. Khel tha pangngai tak Dominik Szoboszlai chuan goal thun theihna hun tha zet mai a nei a, a chhawr tangkai zo lo. Szoboszlai pet hlauhawm zet hi Sam Johnston chuan vanneithlak takin a lo dang hlauh a, an team a chhan him.
Goal lut a awm theih lawk loh hnuin Liverpool an vannei ta nge nge a, chawlhlawk dawn tepah goal an thun. Diogo Jota ball vawrh luh tha tak chu Ibrahima Konaté chuan minute 45’+2-naah fuh zetin a tauh goal a, 1-0 a hmahruai chungin Reds hian chawlhlawk an hmang.
Chawlhlawk hnu lamah inkhel a hmuhnawm leh zual a. Wolves in an si phurh an sut thuai. Si nghak Johnston chet sual vangin Liverpool in goal an thun teuh hle a, Mohamed Salah chuan uiawm takin goal ruakah a pet lut lo. Reds in an hun tha an hlah hnu second half tir lam minute 56-naah Rayan Aït-Nouri chuan goal thunin an si phurh a sut. Wolves in an si phurh an sut theih nachhan hi Liverpool tlarhnungte inthlahlah leh an inman tawk loh vang liau liau a ni a. Hlauhawm pawh ni lem lo kha an inthlahdah vangin hlauhawm takah an siam a, goal an chhuah phah ta hial a ni. Goal an chhuah danah Liverpool tlarhnung an inenlet a, an inzir ngei a ngai ang.
Goal an chhuah hnuin Liverpool an insiamtha a, goal an thun ta thuai. Liverpool in goal thun tuma thapui an thawh laiin Wolves defender Nelson Semedo chuan box chhungah Jota a pawt tlu a, penalty a chawi. He penalty hi Mohamed Salah chuan minute 61-naah awlsam takin a pet goal a, hma an hruai nawn lehna goal a thun. Hma an hruai reng hnuin hun tawp dawn tepah Reds hian goal thun theihna hun tha an nei zui leh a, Johnston an paltlang zo tawh lo thung. Hun tawp thlengin goal dang a luh belh thei tawh lova, Liverpool chuan 2-1 a hnehna changin point thum an hmu ta a ni.
- City an chak zo lo
An mikhual Arsenal lakah vanneihthlak taka tlawm an pumpelh hnua an inkhelh leh hmasak berah Manchester City an chak zo lo leh a, St James Park-a an khingpui Newcastle United nen 1-1 in an inhnehtawk. Newcastle an hmachhawn tum hian Haaland chuan goal a thun lo tehtlat bawk.
Hmahruai chhunzawm thei tura chak mamawh Manchester City hi season thara khel tha Newcastle United hmachhawn turin St James Park-ah an lenglut. An lenluhna mualah goal thun hmasa zawk ni mah se an hmahruaina an humhim thei lova, point thum an hlawhchhuak zo lo.
St James Park a lenglut Manchester City hian bul an tan chhe lem lo viau. Beisei angin goal thun hma thei lo mah se chawlhlawk dawn hnaih minute 35-naah Josko Gvardiol chuan pui zeta pet goal in, hmahruaina goal a thun. Josko Gvardiol goal thun hmangin City hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, Newcastle United in an mikhual an ngam viau a, rin loh takin City hi derthawng zawkah an tang teh tlat. Ngam taka an khingpuite nawrtu Newcastle hian penalty an hlawhchhuak ta nge nge. Magpies hian fuh zetin an nawr tlang a, Gordon chuan goal thun theihna hun remchang a nei. City si nghak Ederson chuan Gordon hi a titlu a, penalty a chawi. He penalty hi a hlawhchhuaktu Gordon chuan chiang zetin a pet goal a, an si phurh a sut.
1-1 a nih hnuin inkhel a hmuhnawm zui viau a, Newcastle in champion lai City an ngam zui hle. City leh Newcastle te hian goal thun theihna hun tha nei ve ve mah se hun tawp thlengin goal an thun thei tawh lova, 1-1 in an inhnehtawk zui ta a ni. City tan hian midfielder pawimawh pahnih; Rodri leh Kevin de Bruyne te an inlan thei lo. Mifield general an tihmai Rodri leh attacking midfielder tha bik, ball pass thiam leh fing em em De Bruyne te awm lo hi City in an tuar a, an tlarhma ten ball tha an hmu tam thei lo.
- Hmahruaitu thar Liverpool
Inrinni zana inkhel hmasa berah hmahruaitu Manchester City an chak zo lova, inrinni zana inkhel hnuhnung berah Liverpool an chak bawk si vangin table-ah inthlakthlengna a awm. Khelh ruk atanga point 15 hmuin Liverpool chu hmahruaitu thar an ni a. Khelh ruk atanga veka point 14 hmu Manchester City chu pahnihnaah an tlahniam. Liverpool in a chung ber an luah thar laiin Wolves chuan table mawngphah an luah nghet ve thung.