Inrinni zana Indian Super League (ISL 2024-25) khelhah Bengaluru FC captain Sunil Chhetri chuan goal khat a thun a. Chhetri hian ISL-ah goal 64 thun tling chiahin, ISL a goal thun hnem ber record thar a siam.
Bengaluru FC hi Sree Kanteerava Stadium-a an mikhual Mohun Bagan Super Giant lakah an khel tha viau a, an mualah 3-0 ngawtin an chak. Bengaluru tan hian Édgar Méndez chuan minute 9-na lekah hmahruaina goal a thun. Minute 20-naah Suresh Singh Wangjam-a’n an goal hnihna a thun hnuin captain Sunil Chhetri chuan minute 51-naah an goal thumna a thun zui leh bawk a. Team lian lakah hnehna lian an chang a, point thum hlu tak an hmu.
Mohun Bagan lakah awlsam taka chak Bengaluru FC hi season tharah an khelh tha viau a, vawi thum an khelh tawhah an la chak vek a, point 9 hmuin hmahruaitu an ni. Hetihlai hian Kolkata club lian Mohun Bagan erawh chuan khelh thum atangin point li chauh an la hmu ve thung.
Mohun Bagan lakah goal khat a thun vangin Sunil Chhetri chu ISL a goal thun hnem ber thar a ni. India tana goal thun hnem ber Chhetri hian ISL-ah goal 64 a thun tling chiah a, khelh 98 atanga goal 63 zet thuntu Bartholomew Ogbeche record a khum. Chhetri hian ISL-ah goal 64 thun turin game 156 zet a mamawh ve thung.