HARSATNA

• Zoliansanga Tlau

“Chhimbal mawi tak a awm theih nan ruahtui a awm a ngai a ni”-DOLLY PARTON

Tunge harsatna, lungngaihna, manganna, tawk ngailo awm le. Harsatna, manganna, lungngaihna leh hlimnate hi kan nun tikimtu an ni kan ti thin. Amaherawhchu, kan nuna harsatna a lo thlen tak tak hi chuan tawrh thiam a har thin a ni ang. Thenkhatin indawm kunin beidawngin, lungngaiin, mahni intihhlum hial duh khawpin an lo hmachhawn thin a. Thenkhat ve thung erawh chuan harsatna karah ni eng mawi tak lo chhuak tur beisei tlatin, hma hun tur an thlir hram hram a, an harsatna tawrh chuan hmalam pan tura nawr kalin, an thilneih mit tep tawh: beiseina, tawrhchhelna leh huaisennate chu tichak tharin, hmalam an pan tang tang thin a, hei hi miropuite zia a ni ang.

Mizo Writer ropui leh hla phuah thiam Vanneihtluanga’n”Lei lungngaihna ka chhiar kim ta”a tih ang mai khan thenkhate hi chuan an lei zin kawng an zawh laiin leilungngaihna an chhiar kim emaw tih mai tur an awm nual. Hamlet Drama-a Lalberi’n “Dinhmun a pheta chan a han chauh tawh laklawh hi zawngin vanduaina hian sal khat khatin min rawn pan lo va, a huho hian an lo thleng zut zut zawk thin” a tih ang maiin Russian thuziakmi ropui LeoTolstoy-a pawh kha August ni 28, 1928-ah a piang a, kum ruk a nihin a nu-in a boral san a, kum kua a nihin a pa’n a boral san veleh bawk. Kum 1862 khan Sophia Behrs-i nen inneiin, an inneih hlim lawkah a epic novel ropui ‘War and Peace’ kha a ziak a. Chumi zawh kum 1873 March thlaah chuan a novel pahnihna tur ‘Anna Karenina ‘a ziah tan lai vêl chuan a hmangaih em em a nî Tatiana-i chuan a boral san a, a nupui lah dam lohnain a tlakbuak bawk a, a fate pahnih a sûn an boral bawk a, chu achhapah a zirna kawng ruahmanna lah chu thuneitute’n an tih thuanawp sak lehnghal a. Kum 1876 leh 1897 inkar chhoah phei chuan a anxiety neih avangin mahni intihhlum hial duhnate neiin a hringnun a hmang a; mahse, vanneihthlak takin intihhlum em chu a hlawhtlintir ta lo hlauh va (Leo Tolstoy by Ronald Seth, ‘A choice of Prose’, Oxford University Press, 1971, p. 119 -127).

Furpui a lo inher chhuak a, ruah sûr turin kawlkil a tidur khup a, ruah tuipai chum a zing chuk chuk bawk a. Chu chhum chuan min bawhin min hual khup mai a. Hawina lam apiangah chuan chhum zing hlir bâk hmuh tur a awm lo. Lung a va zing tehlul êm tih mai awl tak a ni ang! Chutah ruah a han sûr a, a hân mai dâwn em mawni tih laiin ni hnihni thum, kar khat dâwn te a han sûr leh nghal a. Ni eng mawi tak hi a chhuak ngai tawh dâwn lo em mawni chu âw tih rum rum mai a awl thin a ni tir’u. Mahse, a sur reng bîk lo a sin. Ni eng mawi tak chuan khaw dur leh chhum te chu nawr kiangin a thiltihtheihna chu khawvel tan a rawn lantir leh dawn e. Chuvang chuan in dawm kunin, beidawnin kûn reng suh. Tlaivar dâwn dâwn a i mittui sûr thin kha bân tir tawh teh, saw Ni paw’n chhuah zai a rel ve leh tâk saw.

Ni leh thla leh arsite pawh hian,
En hun bi an nei ang khian.
Hlim ni,lawm ni, tah leh lungngaih nite,
Mihring nunah an inen chhawk thin. (Triau Trackx ‘Bâng tawh r’u’)

Harsatna han tawh malh malh hi chuan vanduai bîk, rethei bîk, khawngaihthlak bîk riau va inhriat a awl thin khawp mai. Kan chan hi chanchhe bîk ngawih ngawih leh vanduai bîk ngawih ngawihin kan hre thin. Mahse, hringnunah hian lungngaihna leh tahnate’n min chimin min rahbet chang awm mah se, min diriam reng bîk lo va, hlimnate pawhin kan nunah thla an zar ve fo asin. Kan ngaihtuahin kan ngaihven peih lo thin mai pawh a. Harsatna te’n min bawih tlat avangin lawmna leh hlimna te chu kan hmuh kân thin zawng a nih hi. He kan zin kawng pik leh zing mup, beidawnna leh tahna te’n min hual khupna hmun leh hunah hian beiseina thar nei zel turin he hla hian min fuih lawm lawm a ni. Hawh u, beiseina thar nen kan hringnun zin kawng hi i zawh thar leh ang u hmiang.

Harsatna, manganna leh lungngaihnate hian min tihrehawmin min tichau viau thin mah se, thu leh hla lamah chuan a thawh hlawkin, thu leh hla tha tak tak min petu a ni ang. Kristian-te’n kan sak zing ber pâwl ‘Lal Isua Kan thian tha Berin’ tih hla pawh hi a phuahtu Joseph Scriven-a’n manganna rapthlak tak tuara a nupui ni mai turin vanduaithlak taka a boralsan hlauh avanga he hla hi lo piang a ni. A thil tawrh rapthlak tak mai chuan beidawnna leh rilru hrehawmna neih tirin, thil tam tak ngaihtuahin Pathian hial a ngaihtuah chhuah tir ta a; A hmangaih ber chân mah se Pathian chu a thian tha leh a mangan lai pawha a kianga awm reng leh, amah lawm rengtu ,awmpuitu leh chenchilhtu a ni tih hriain “Lal Isua kan thian tha berin kan manganna laiin min lawm” tiin a rawn phuah chhuak ta a ni (Rev. Lalngaihawma, ‘Kristian Encyclopedia’, 2009, p.194).

Hla tha tak tak an phuah theihna tur atana mitdel ni tura piang tih mai tur, mitdel ni chunga hla tha tak tak phuah thei Fanny.j.Crosby-i atanga Suakliana te, epic poem ropui tak tak phuah thei John Milton-a te hi i ngaihtuah ngai em. John Milton-a (Dec 9, 1608 – Nov 9, 1674) khan harsatna hrang hrang tuarin a tawk nasa hle a. A zin kawng kha a khirh khan ve hle. Hamlet-a drama-a Lalnui’n “Vanduaina hi zawng a va inphaman duh tak em aw! Laertes, i fanu tuiah a tla” tih ang mai khan kum 1642 June thla khan kum 16 mi Mary Powell-i chu nupui atan a nei a, hetih lai hian Milton-a hi kum 34 a upa a ni tawh. A nupui Mary nen hian hun eng nge maw chen an inthen a; mahse, inthen hlen lovin an innei leh a, fapa pali an neih hnu kum 1652 May ni 5 khan vanduaithlak takin Mary Powell-i hian a boral san a, hemi kum 1652 atang hian a mit pawh a del nghe nghe a. (Prof Siamkima khan “…kum 44 a nih kum 1952 -ah a mit a del hmaih lehnghal a..” (Zalenna Ram, Fourth Edition – 2016, p.54)-ah khan a ziak a; mahse, 1952-ah chuan kum 344 a ni dawn avangin a kum hi a ziak sual a nih hmel a, 1652 tih tur a ni.) Tichuan, kum 1656 November ni 12-ah a vawi hnihna atan nupui Katherine Woodcock-i nen an innei leh a; mahse, innei rei lovin kum 1658 February ni 3 khan a nupui pahnihna hian a boral san ve leh a. Kum 1660 khan Kum 1662 February ni 24 khan a nupui pathumna ni turin Elizabeth Mynshull-i nen an innei leh a ni. Kum 1638 khan house arrest-a tang astronomer ropui Galileo-a pawh a lo tlawh tawh a ni awm e. Prof. R.L. Thanmawia paw’n hetiang hian a lo ziak a: “Hmasang thawnthu leh mi hrat khawkhente chanchin hle epic poetry an tih phuahtu ropui bera an chhal thin John Milton (1608 – 1674) pawh kha a hun hmasa lamah chuan lehkha thiam a ni bawk a, pa challang tak a ni a; mahse, lung inah a tang a, khaihlum hlau reng rengin a khawsa a, a hla phuahte an halsak bawk a. A nupui hmasa berin fa pathuim a neih hnuah a chhuahsan a, a tawpah a hawng leh na a, a thi ta thuai si a. A nupui pahnihna nen chuan an inhmangaihin, an inngaina hle a; mahse, rei lo teah a sun leh ta mai a. A mit a del zui ta leh zel a. A nupui pathumna lah chu nu rawva tak alo ni a, a fa hmasate a tirethei em em a, hlim ni hmel an hmu tam lo hle. Milton-a zinkawng hrehawm tak mai tizualtu chu a nupui chauh pawh ni lovin, a ruhseh na benvawn chu a la ni lehnghal a. A zinkawng a rapthlak chungchuang kher mai…John Milton-a khan a mitdel hmain thu leh hla eng emaw zat lo phuah mah se John Milton-a nihtirtu chu a mitdel hnua a hla ropui tak tak – Paradise lost, Paradise Regained leh Samson Agonistes te kha an ni tlat” tiin (R.L. Thanmawia, ‘Chuailo’ – 1-na, 1997, p.133 & 135).

Harsatna leh retheihna te’n a lo sawp hrep tawh leh a lo thuai hrep tawh, Mizo literature huanga Ph.D hial hlawh chhuak thei, Prof. Dr. RL Thanmawia chuan, “Retheihna hi ka chaw a ni a, harsatna hi min chher puitlingtu pum a ni” tiin a sawi. Hei vang hian a essay ‘Retheihna’ tih a ziah te kha a thlumin rilru a khawih ngawt mai. “Harsatna hi eng ang mi nge kan nih tih lantirtu a ni“, tia Epictetus-an a sawi ang khan, harsatna hrang hrang tawka tuartute atang khian a dik zia an tarlang chiang mang e.

English critic thenkhatte khan author an luh chilh deuh mah mah thin a ni awm e. Chung zinga critic te’n rilru nâ taka an siam pakhat chu John Keats-a kha a ni a. Thil chikmi mi thenkhatte chuan John Keats-a thih hma chhanah an puh hial a ni. Kan hriat theuh angin John Keats-a hringnun kha a chhuk chhovin a thim hle a. A hun tawp lamah ngawr natna (T.B)-in a tlakbuak a, sum lamah harsatna tawkin a pachhe hle a, a poetry bu a chhuahte chu han hralh ve bawk mah se, hralh a kal teh vak lo a ni awm e, chu a chhapah critic hovin a poetry te chu chanchinbu (Blackwood’s megazine leh Quarterly)-ah tawngkam hriam tak tak hmangin an sawiselin an lo bei ve sek bawk nen, atan chuan a natna belhchhah saktu a ni ngei ang tih a chiang. Lord Bryon-a pawhin hetiang hian a ziak hial nghe nghe:

“Who killed John Keatst
‘I’ say the Quarterly,
So savage and tartarly;
‘Twas one of my feasts.

Prof. Siamkima paw’n “John Keats-a chuan a hla phuah Endymion chu Blackwood Megazine leh Quarterly Review ten an lo deuhsawhzia a lo hmuhin a rilru a natzia a thian lehkha thawnah a sawi lang a (Keats’ letter to Hassay, October 9, 1818). Mi thil chik mi thenkhat chuan Keats-a hriselna pawhin a chhiat phah lehzualin a thih hma phah hial niin an sawi. Mahse Keats-a chuan mahni inrin tawkna a neih thlat avangin, rirlu na tak chungin ‘ka thih hnuah chuan English poet zingah chhiar tel ve ka nih tho ka ring’ a la ti fan a (Keats’ letter to Georgiana, October 15, 1818). English poet zingah chhiar tel zawng a lo ni na meuh mai. Keats-a hi kum 26 mi lek niin, Rom khuuah thi a ni” (Zalenna Ram, Fourth Edition – 2016, p.145).

James Dokhuma novel ‘Thla Hleinga Zan’ pawh kha Peter Lianhleia’n a bihchiannaah hetiang hian a sawi a,”Zirna nei sang vak lo thawnthu ziak hmasa berah chuan iaiawm tak chu a ni lova, mahse, College-a Mizo tawng leh literature zirna sang ber B.A. zirna atan em chuan a iaiawm lo thei lo, a thlak thuaitu tur, a aia tha neih thuai a duhawm deuh a ni” tiin (Thu leh Hla March ’78,p. 14). A novel bih chianna, Peter Lianhleia ziak chu James Dokhuma’n a han chhiar chuan a rilru a ti nâ hle a ni ang “Manilomaha ka lo insita ka zir sân loh avanga lo zak rilru ngawih ngawih thin, khatia kan mithiam berte zinga miin min han vuak takah phei kha chuan keini ang rual tan chuan mahni thiam ang tawk tawka a dang ziak leh tur pawhin min tiphûr (encourage) lo hle mai…Mizo zingah hian ziaktu dang an awm loh thuah mi thiam zawkte cho chhuah nan kan ziak ve chauh a ni a. Mahse, cho chhuah a hnehin kan mi thiamte hlei hlei chuan min lo ngainep ta si em ni tih tura tawngkam an han neih zauh phei hi chuan keini ang rual zawngin tih leh ngam chi a ni lo vang” (Thu leh Hla Sep, ’79,p. 32) tiin inthlahrung leh insit takin a au chhuak a nih kha! Zirna sang nei lo thu ziak thiam, literature kan sawi a pianga kan sawi hmaih ngai loh tur William Shakespeare-a pawh kha Peter Lianhleia hi chuan a thuziah te kha a dah sang vak awm love! Peter Lianhleia hian khatiang khan sawi mah se, ‘Thlà Hleinga Zan’ hlutna a tinep pha chuang lo va. Mizo novel kan sawi apiangin ‘Thla Hleinga Zan’ hi kan sawi hmaih tawh kher lo vang. Chutih rual erawh chuan sawisel tur awm miah lo khawpa thuziak tha leh lehkhabu tha erawh a vang mai thei. Chutiangin lehkhabu ziaktute pawh sawisel tur awm miah lo khawpa mi tha famkim, mi thiam leh mi fing chung chuang an viau bawk ang. James Dokhuma khan kum 1970 khan ‘Thla Hleinga Zan’ kha a tichhuak a. Peter Lianhleia khan rilru na takin siam mah se, a kawlawm a chawlh tir loh kha a ropui ngawt mai. Kum 2005 thleng khan ‘Mizo Tawng kalphung’ tih lehkhabu a la ti chhuak a nih kha. Harsatna paltlanga hnehtu kan tithei ang.

“‘A theih loh’ tih min hrilh tute chungah hian ka lawm hle a ni. A chhan chu anmahni avangin keima’n ka tih puitlin theih phah a,” tih sawitu Albert Einstein-a (March 14, 1879 – April 18, 1936) khan ‘General relativity Theory’ a hmuh chhuah hma khan harsatnain tlakbuakin, a nupui nen an inthen a; a fapa nen an awm hran a ngaih phah ta hial a. Chutiang harsatna karah chuan a thianpa, German physicist Mark Planck-a khan Albert Einstein-a hnenah, ”Ka thurawn che chu, tuna i thiltih laiah hian i hlawhtling dawn lo, lo hlawhtling pawh ni la tuma’n an ring chuang lo vang che,” ti meuhvin a hrilh a nih kha. Amaherawhchu, beidawng duh lo Albert Einstein-a chuan kum 1915 khan ‘General Relativity Theory’ chu a hmu chhuak ta a ni.

Eng pawh ni se, harsatna hrang hrang tawkin, zin kawng thim tak kan zawh pawh a ni mai thei e; a pawimawh ber chu harsatna chu engtin nge kan lo hmachhawn tih hi a ni. Huaisen takin harsatna kan hmachhawn dawn nge, harsatna kan inhneh tir zawk dawn. I duhthlanna a ni e.

“Mangan nia i chauh mai chuan i chakna a beitham a ni” Thufingte 24 :10