Kar tawpa football hnuhma langsar zual kan hrut kual leh thuak thuak ang.
- English Premier League
Inrinni zan khan champion lai Manchester City chu Newcastle United nen 1-1 in an inhnehtawk. City hi EPL-ah khelh 29 chhung tlawm nei lovin an kal tluang mek a. An club chanchinah EPL-a tlawm an neih loh rei pahnihna a ni a, EPL-ah tlawm nei lova an kal tluan rei ber tum chu April 2017 – January 2018 chhungin khelh 30 chhung tlawm an nei lo kha a ni.
Pathianni zan khan Tottenham chuan Old Trafford-ah ngei 3-0 in Manchester United an hneh. Spurs hi EPL chanchinah Old Trafford-a hnehna chang hnem palina an ni. Erik ten Hag hnuaiah United hi 3-0 in vawi thum an tlawm ta chiah a. Ten Hag chuan 3-0 a tlawm hnem lamah Sir Alex Ferguson record a nih rual.
Inrinni zan khan Brentford chuan an mikhual West Ham United lakah inkhel tan atanga minute khat chhungin hmahruaina goal an thun. Brentford hian season kal mekah inkhel tan tirh minute khat chhungin vawi thum ngawt goal an thun zawn tawh a. EPL-ah hetiang ti thei club hmasa ber an ni.
Season kal mekah Chelsea tan Cole Palmer a chetha hle. Palmer hian Inrinni zan khan Brighton lakah goal li ngawt a thun. Palmer hian season liam ta tan tirh atang tun thlengin EPL-ah goal 42 a thawkchhuak tawh a, hemi chhunga goal thawhchhuah tam lamah Erling Haaland a nih rual.
- Spanish La Liga
Inrinni zan khan Osasuna chuan an mikhual FC Barcelona chu 4-2 in an hneh. Osasuna hian kum 40 hnu lamah Barcelona laka goal li an thun hmasak ber a ni a. Barca lakah hian goal li hi vawi hnih bak an la thun thei lo.
Osasuna laka an tlawm tum hian Barcelona rawlthar Lamine Yamal chuan goal a thun. Yamal hian La Liga-ah goal 9 a thun tling der tawh a, kum 18 tlin hmaa La Liga-a goal thun hnem pangana niin Real Madrid Golden Boy Raul Gonzalez record a nih rual.
- Italian Serie A :
Juventus chuan season tharah goal an chhuah lo tluang zel a. Juventus hi Top 5 Europeans league team zingah season kal meka goal chhuah lo awm chhun an ni.
- German Bundesliga :
Bayer Lekerkusen chuan an elpui lian Bayern Munich lakah tlawm an pumpelh zui zel. Leverkusen hian Bayern lakah match li tlawm an pumpelh ta a, Bundesliga-ah Bayern Munich laka an tlawm loh zawn rei ber a ni hial a ni.