September 30, Thawhtanni khan LZ Juice MPL 11 league round khelh zawh a ni a, semi-final lut tur a hriat kim theih chiah. MPL 11 League round ah Aizawl FC an chungnung viau a, tlawm nei lovin an champion. Aizawl FC hian champion turin an khingpui Chawnpui FC chu 3-0 in an hneh. Inkhel dangah MPL club thar Sihphir Venghlun FC chuan an khingpui SYS an hneh a, semi-final an lut ve bawk.
MPL 11 round 14 naa inkhel hmasa berah Chanmari FC in tlahniam chiang tawh FC Bethlehem an hneh a, CFC hian Aizawl FC an lehpel hman a, league champion an ni hman. Thawhtannia inkhel hnuhnung berah champion tura chak mamawh Aizawl FC in an khinpgui Chawnpui FC chu 3-0 ngawtin an hneh ta si a, AFC hi League champion an ni zui ta a ni.
Chawnpui FC lakah chak ngei tuma inlan Aizawl FC hian bul an tan tha viau a, inkhel tan atanga minute ngana lekah Lalhriatpuia chuan hmahruaina goal a thun nghal. Hma takah goal an thun vangin an phur a, inrintawkna sang zawk nen an inlan zui theih phah bawk. Champion turin AFC hian Chawnpui FC an hneh ngei ngei a ngai a, tlawm emaw, draw emaw a thiang lo. MPL-ah hian point hmuh zat inang an awm a nih chuan head to head en hmasak a ni a. AFC hian head to head ah Chanmari FC an ngam lo. Heti a nih vang hian Chawnpui FC hneh ngei an ngai a, inkhel pawimawh takah hma taka goal an thun vangin an thaw huai tura ngaih a ni.
Goal lut hma viau mah se inkhel hmuhnawm takah goal dang a luh belh thei lawk lo thung. Hun rei tak chhung goal a luh belh theih loh hnuin MPL 11- a khel tha tluang tak Lalbiakdika chuan minute 66-naah an goal hnihna a thun a, Aizawl FC hmahruaina a tizau. Goal thun ngei tumin Chawnpui FC in tan khawh bawk mah se hun pek belh minute 90+5-ah Lalrinzuala chuan an goal thumna a thun zui leh a, dan rual lohin an champion zui ta a ni.
MPL 11 League round-ah Aizawl FC hian tlawm an nei lova, MPL League round-ah tlawm nei lova champion thei hmasa ber an ni a, record thar an siam. I League champion hlui Aizawl FC hian khelh 14 atangin goal 34 an thun a, MPL awm tawh zawng zawngah season khata goal thun hnem ber record thar an siam bawk. MPL 11-ah hian a vawi khat nan League champion in Champion Shield an dawng a, AFC hi MPL League champion Shield dawng hmasa ber an ni tel bawk a, season kal mekah an tha chungchuang hle.
- Sihphir Venghlun an tlang
Thawhtanni a inkhel dangah chak mamawh Sihphir Venghlun FC chuan an chung chiaha awm SYS FC chu 2-1 in an hneh a, MPL an hmachhawn hmasakna berah semi-final an lut nghal.
Semi-final lut thei tura chak ngei ngei mamawh Sihphir Venghlun FC hian SYS FC lakah bul an tan tha lova, goal chhuah hmasa zawkah an tang. SVFC hi minute 12-na lekah an chesual a, penalty an chawi. He penalty hi SYS tan Lalruatsanga chuan awlsam takin a pet goal a, hmahruaina goal a thun. Hma takah goal an thun vangin rawlthar team hmuhnawm SYS FC phur viau mah se an phur rei lo. SVFC tan hian Lalramluaha chuan minute 15-naah goal thunin an si phurh a sut a. Lalthanpuia chuan minute 18-naah hma an hruai letena goal a thun zui leh nghal zat bawk. Minute thum chhung leka goal hnih an thun hmangin SVFC hian hnehna hlu tak an chang a, Aizawl FC hmachhawn turin semi-final an lut ta a ni.
- MPL Semi-final
MPL 11 semi-final thawhkhatna hi October 7, Thawhtan zan dar 8:00-ah khelh a ni dawn a, League champion Aizawl FC in palina Sihphir Venghlun FC an mikhual dawn. Thawhleh zan dar 8:00 ah Chanmaru FC leh Mizoram Police FC an inhmachhawn ve thung dawn a, anni inkhel hi hmuhnawm viau tura a ngaih a ni.
Semi-final thawh hnihna hi October 11, Zirtawp zanah khelh a ni ang a, Sihphir Venghlun FC in Aizawl FC an mikhual ve thung ang a. Inrinni zan dar 8:00-ah Mizoram Police FC in Chanmari FC an mikhual ve thung ang a, final a intum tur tihchian a ni ang.