Aizawl: MZP General Headquarters Extended OB Meeting nimina neih chuan tun hnaia AMC hnuaia hna lakah thil felhlel, mi mal induhsakna uchuak a awm ngei nia hriain a rang thei ang bera suta dik taka hna la thin turin AMC hotute a ngen.
MZP chuan, “AMC Executive Council Meeting September 11, 2024 chuan an hnuaia hna hrang hrang, fixed pay leh contract basis a lak nise a ti a. Meeting thurel ang hian hnate hi advertisement tel lovin, an mi duhsak zawng an la ngei niin a lang a. Thalai lehkha thiam hna zawng tam tak awm karah duhsak zawngte hnaa thun thawm hriat tur awm fo hi MZP chuan pawi a ti a, a dodal tlat,” an ti.
MZP tar lan danin, AMC Executive Council Meeting chuan Public Relations Officer-1, Project Assistant-2 leh Asst. Account Officer-1 te hi fixed pay-a lak turin a rel a, lak fel tawh a ni a. Consultat Geologist-5, Urban Animal Husbandry & Veterinary Officer-1 leh Junior Engineer-1 contract basis-a lak tura tih a ni bawk.
“Heng hna, hlawh pawh tha tak tak hi a duh apiang dil theih turin advertisement chhuah a ni lo va. MZP-in a chhui zelnaah phei chuan sawrkar phalna pawh an la lo nia hriat a ni,” tiin, MZP General Headquarters Extended OB Meeting chuan AMC hnuaia dik lo taka hna lak hi tun kar chhunga sut turin AMC hotute a phut a. An ngennain awmzia a neih loh chuan zirlai hna zawngte thlavang hauh tura hma an lak tur thu an sawi.