Aizawl: Excise & Narcotics Station thar chu nimin khan Chief Minister Lalduhoma’n Saitual-ah a hawng a, sorkar chuan ruihhlo do leh tihrem a ngaih pawimawh takzet tih a sawi.
Saitual DC pisa hluia Conference Hall-a hawnna inkhawmah chief minister chuan ruihhlo dona atana hmun pawimawh ni turin Saitual district-ah Excise & Narcotics Station chu hawn a ni tih a sawi a. Ruihhlo do kawnga hnathawk turte pawh lak belh a nih theih nan sorkarin theihtawp a chhuah tih a sawi a. Khawtlang leh kohhran hruaitute pawhin ruihhlo do kawngah theihtawpa hma la zel tur leh Excise & Narcotics department nen pawha thawhhona tha tak nei turin a chah.
Lalduhoma chuan sorkar hnathawkte chu sorkar rawih an nih angin tangkai taka thawk chhuak tur an ni tih a sawi a, Excise & Narcotics department hnuaia thawktute zawng zawng chu ruihhlo laka fihlim tur leh thahnem ngai taka hnathawk turin a chah bawk.
Excise & Narcotics Minister Lalnghinglova Hmar pawhin thu sawiin, Saitualah Excise & Narcotics department-in hmun an nei ve thei ta chu lawmawm a tih thu a sawi a. “Mizoram sorkarin ruihhlo hluar mek chu a ngai mawh a ni,” a ti a, department hnuaiah hnathawk turte la tharin, lirthei 18-te pawh pek an ni tawh tih a sawi.
Excise minister chuan Saitual chu ruihhlo tlemna ber district ni turin kohhran leh khawtlang hruaitute leh sorkar department hotute chu Excise & Narcotics department-te tha taka thawhpui a, tangrual taka hma la turin a sawm.
Excise & Narcotics Station hi Saitual bakah district thar, Khawzawl leh Hnahthialahte pawh hawn a ni dawn a. Station pathumah hian thawktu mi paruk theuha bul tan tur a niin, Saitual station-ah hian R. Lalruatliana chu Officer-in-charge a dah a ni.
Station hawnna inkhawm hi Lalramsanga Sailo, IRS, Secretary, Excise & Narcotics Department-in a kaihruai a, Z. Lalhmangaiha, Commissioner, Excise & Narcotics Department leh Saitual Bawrhsap Dr. Lalngura Tlau ten thu an sawi bawk.