Zemabawk-a Multi Sports Complex sak thar chu UD&PA Minister K Sapdanga’n Inrinni khan a hawng.
Hawnna inkhawmah K Sapdanga chuan UD&PA department chu Smart City project nena an tandunna hnuaia sports hmunhma satuah an tang thin a, a hlawhtlinna an hmu chho zel chu thil lawmawm tak a nih thu a sawi a. Hetih lai hian, Aizawl khawpui chhungah hmun zau tha a vâng a, duhthusama hma lak a harsat chin a awm tih sawiin, Zemabawka Multi Sports Complex chu hmang tangkai turin veng chhung thalaite chahin, infiammi tha tak leh hlawhtling tak, ram chawimawi tha thei tur khawpa chherchhuah tum turin a chah.
Sorkarin infiamna hmunhma tha tak tak a buatsaih chhan chu an tu leh fate tana infiamna hmun tha tak an neih theihna tur a nih thu sawiin K Sapdanga chuan, “A lawmawm rualin thalaiteah chona nasa tak a pe a, thalaite tana hamthatna siamsak chu sorkar hlawhtlinna a ni a. An hma hunah pawh sorkar nen tangruala theihtawp chhuaha mipuite hmasawnna thlen tir chu kan zavaia mawhphurhna a ni,” a ti.
Aizawl East I bialtu MLA F Lalthansanga, Forest Minister pawhin a bial chhunga sorkarin infiamna hmun tha tak a siam chu lawmawm a tih thu a sawi a. Uluk tak leh felfai taka vawn chu a vengchhung mipuite an zavaia mawhphurhna a nih thu a sawi.
F Lalthansanga chuan Mizoram chu sorkar laipuiin project thahnem tak a pe tawh chunga intodelhna kawngah an la hniam avangin sorkar laipui chuan state sorkar hnena project a pek te chu a hmuna enfiah zel an duh tawh tih sawiin, “Hei hi Mizoram sorkar duhdan pawh a ni a, tun atang chuan ti mai mai lovin tih takzet nena hna kan thawh a ngai a ni,” a ti.
Inkhawm hi UD&PA Secretary Lalmalsawma Pachuau-in a kaihruai a ni.