Chelsea chuan defender Trevoh Chalobah chu Crystal Palace an hawhtirna atangin an ko kir.
Kum 25 mi hian Chelsea squad-a chawn tha na avanga Wesley Fofana leh Benoit Badiashile te chawl ai a awh thei dawn a, manager Enzo Maresca-a’n tlarhnunga ding tur a tlakchham a phuhru dawn a ni.
Chalobah hi Thawhlehniah Palace-in Premier League-a Leicester an hmachhawn hma lawka koh kir a ni a, tun thla tawp thleng koh kir theihna hun an nei.
Hmanhmawh taka an ko vut vut hi Palace pawh an lawm vak lo va, Pathiannia FA Cup-a 1-0-a Stockport County an hneh tuk lawkah an ti a ni.
Palace manager Oliver Glasner chuan an indawr dan chu ‘contract thil’ a nih thu Thawhlehni khan a sawi a, “Amah chuan la awm a duh a; mahse, thutlukna siam thei chu Chelsea an ni si,” a ti.
Chalobah hi Selhurst Park-ah hian inkhel bul tantu a ni ziah a, London chhim venga thla li leh a chanve a awm chhung hian vawi 14 a inkhel hman.
Central defender hi a hma khan Chelsea-a an duh loh zingah telin first team-a tel pha lo, a hrana training, ‘bomb squad’ an tih zingah a tel a. An zingah hian England international Raheem Sterling leh Ben Chilwell te pawh an lo tel.
Chalobah hi Chelsea-a a kir leh hunah chuan khelhna hmun a nei ve tawh dawn nia hrilh a ni a, a let leh hma hian sporting director Paul Winstanley nen an inkawm hmasa a ni.