Milarte khawharna

Korean tuifawnin min chim tak tak hnu-ah a tha lo leh duhawm lo zawnga nghawng te pawh a tam chho hle a. Mizo thalaite zingah pawh a mikhual lo. K-pop star te zingah depression benvawn nei leh nun ning ngawih ngawih an tam chak a, mahni thu-a khawvel an chhuahsan thu a ri chuah chuah chho reng bawk.

  • Khawthlang lam hawi ila

Kum 36 ni-a hun lo taka a thihna chuan khawvel a barakhaih a, tun thlenga a mawina leh mi hipna nasa tak a neih dante chu hahip tak meuha sawi a la ni a, hmeichhe hmeltha leh duhawm an sawi apianga hmaih hauh loh leh langsar bera lang thin chu Marilyn Monroe a ni. Hun tawp a hman dan erawh vawiin thleng hian ti ti lian ber a la ni reng. Thil mak a tling.

Mak tak maia a thihna hi timak lehzual turin hman kum deuh mai khan supermodel Brigitte Bardot chuan, “Mahnia intihhlum tumin vawi tam ka lo bei tawh thin a, tun thlenga ka la dam tlat maite hi thil mak tak zawng a ni,” a ti.

Hei hian hlawhtlinna, mawina leh mahnia pawi inkhawihna hian inzawmna a neih dan chu buaipui tham a tling ta hial nia ngaihna a lian nghal.

Engvanga khawvela ‘ber’ an nih laia, an taksa chu engmah lo maia an hnutchhiah thin ni?

  • India ram thlir ve thung ila

Kum sawm liam ta khan Model lar, Viveka Babajee a intihlum ta mai chuan a chhungte leh thiantha te a barakhaih nasa hle. Hemi hma lawk hian, model hriathlawh, Kuljeet Ranmdhawa pawhin a nunna a lo la tawh bawk a, a thian tha tak leh supermodel lar, Nafisa Joseph pawhin a kum leh maiah a thiannu hnung hi a zui ve leh mai bawk nen!

Lockdown vanglai chho ah te khan milar zingah sum leh pai tlakchhamna, rilru hahna benvawn leh manganna te vangin mi thahnem takin an mahni thu-in khawvel an lo chhuahsan tawh bawk a, milar zingah a ruk taka mangang, buai leh beidawng an pung zel.

  • Lar mah se, engmah nei lo

Marilyn khan heti ang hian a lo sawi tawh a, “Mipui leh khawvel ‘ta’ ka ni a, hei hi ka themthiam vang emaw ka mawina vang erawh a ni hauh lo. A chhan lian ber chu, tu ta mah ka ni lova, engmah hi ka neih loh vang a ni,” a ti.

Dr Khurana chuan, “A hma atanga tum lawk a ni a, thil thleng palh a ni ngai lo. Hmeichhe hlawhtling takte hian an mimal nuna hlawhtlinna neih ngei tuma hma an lak hian an beidawng leh thin. An rilru chhungril ngaihtuahna (feeling) hneh tuma tan a laknaah hian amah leh a mah hi a inhliam a, awmzia a nei bawk si lo a ni. A nuna thil thleng ngai lo leh a tumchhin ngai loh chu a tlukpui ta thin,” a ti.

  • A va’n khawharthlak tak!

Korean superstar Kim Dual khan social media lamah hetiang hian a ziak a, “Aw, a van khawhar thlak tak em… Hmanah leh tunah pawh hian danglamna a awm chuang lo” tiin khawvel a chhuasan hmain a chhung-ril a phawrh chhuak a. Chutah, Jim Rivers hla a dah bawk a, a hnu reilote-ah Paris-a a chennaah inawkhluma hmuh a ni ta.

Paris Fahion Week-a hriathlawh tak a ni a, thâwkkhat lai phei kha chuan fashion magazine lar, Vogue leh Harper’s Bazaar kâwm mawitu-ah a tang zak zak nghe nghe. Engngatinge hmeichhe hlawh-tling tak takte hi an chak loh em em thin a, khawvel hmâa an tum loh pui ti tura nawr kaltu thihna chu an her liam pui thin le?

Miss India World 2008 Simran Kaur Mundi chuan, “Hmeichhe hlawhtling tak takte hian thian tam tak karah thian tha tak nei turin harsatna an tawk nasa hle a. Chu bakah, ‘ber’ nihna hauh tawh hi chuan lan dan leh kawng engkimah phuartu lian leh rit tak hi a lo awm mai thin a, an chauh pui em em thin a ni. Rilru paukhauh te bawk hi an damchhuak leh thin,” tiin a sawi.

  • Depression a ri fo

A meizang hlaptu bera sawiah chuan rilruhah benvawn (depression) hi a ni a, kawppuite nena inthen/ban ai pawha tawrhna nasa zawk thlentu a ni. Chhungrilah thûk takin zung a kaih a, hriatchhuah a nih meuh erawh chuan a lo tlai hman tawh thin.

‘Almost single’ lehkhabu lar tak ziaktu Advaita Kla chuan, “Depression hi natna a ni a. Hritlang ang maia hriat theih leh, enkawl vat ngai a ni. Mi tute pawh hian rilruhahna lamtluang kan zawh vek a ni,” a ti ve bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427