Hun tawp hnuah Felix-a’n Milan zawm fel

Chelsea forward Joao Felix chuan thlasik bazar hun tawp fel hnuah loan-in AC Milan chu tun season tawp thleng khel turin a zawm fel ve hman ta.

Italian club hian loan fee-ah £ maktaduai 5 an pe a, kum 25 mi Portugal hi nipuia lei nghal theih turin an inrem tel lo thung.

Inremna hi Thawhlehni khan puan fel chauh a ni a, lehkha tihfel ngai erawh bazar hun tawp hma, Thawhtanni khan an inpe lawk tawh a ni.

Felix-a hian August thla mai khan kum sarih daih turin Chelsea hi £ maktaduai 45-in a zawm a, loan-in Stamford Bridge-ah hian 2022-23 season chawhnu lam kha a lo khel tawh bawk.

Felix-a an lak luh chhan hi Chelsea leh Atletico Madrid player inthleng kualna a ni deuh ber a, an academy graduate Conor Gallagher chuan Spain hi £ maktaduai 33-in a zawm ve thung a ni.

Chelsea hian Atletico striker Samu Omorodion chu lak luh tumin an dawr a, hei erawh a hlawhchham a. Atletico hian Gallagher an lak luh ve duh tho si avangin a aiah Felix-a hi an leitir a ni deuh ber.

Gallagher-a kha khatih lai khan Stamford Bridge-ah kum khat chauh contract a nei tawh a, kum 2025 nipuia man awm lova an chhuah mai loh nan hralh ngei an lo duh ve tho bawk si a ni.

Felix-a hian Premier League-ah vawi thum chiah inkhel bul a la tan a, cup-ah erawh khel ngunin goal sarih a thun tawh.

Forward hian Benfica atanga bul tanin £ maktaduai 113-in July, 2019 khan Atletico a pan a, a hun laia player man to pangana a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427