Tashkent, Uzbekistan-a World Arm Wrestling Cup 2025-ah Denic Lalruattluanga chu final-ah a chak zo ta lo va, khawvel huap pawhin ngam loh pakhat chiah neiin silver medal a la.
Asia-a banelh chak ber ni mek, ITI Veng, Aizawl tlangval hian Senior Men 80kgs huang final-ah vawi thum world champion ni tawh, Danil Ustinov chu a hneh lo hlauh a ni.
Mizoramin World No. 2 a nei thei chu Mizoram Arm Wrestling Association (MAWA) chuan lawmawm a tiin an chhuang tak zet tih an sawi.
Chief Minister Lalduhoma pawhin Denic-a chu Mizoram leh India tihmingthatu a nih thu a sawi.
Chief minister chuan pakhatna dinhmun chang zo lo mah se a duai lo hle tih a sawi a, Denic-a chu a lawmpuiin Mizoram leh India a tihmingtha tih a sawi.
Sports Minister Lalnghinglova Hmar pawhin lawmpuina thu sawiin Mizo tlangval, Denic-a’n silver medal a la thei hi chu a lawmpui a. Mizoram mai ni lo, India tihmingthatu Mizo tlangval a ni chu lawmawm a tih thu a sawi bawk.