Agriculture Minister PC Vanlalruata chuan lo neitute tan thlai thar chhuaktu leh a hralhna buaipuitu nih khawp chu a hna hnihin a hautak em avangin thlai tharte lilamna tur platform siam an tum thu a sawi.
Inrinni khan Mission Foundation Movement-in Ministry of Tribal Affiars hnuaia Support to Tribal Reseach Institute Fund hmanga Social Welfare & Tribal Affairs department kaltlanga iskut chingtute dinhmun leh an hmalak mekna zirchianna neih mekah Siphir, Lungdai leh Durtlanga a chingtu chhungkaw 60 hnena lei tha semna, Sihphir Kawn venga Rohrenga Hall-a buatsaih a hmanpuinaah PC Vanlalruata chuan, “Sihphir, Lungdai leh Durtlang te hian iskut tam tak thar chhuakin chhungkaw tam tak eizawnna a lo ni tawh thin a. Mizoram bakah ram pawn thleng pawha thawn chhuah thin a ni. Kum 10 vel kal ta atang khan thar chhuah a tlem tial tial a, tun dinhmunah phei chuan tihtham thar chhuah a awm ta meuh lo,” tiin, iskut thar chhuah a tlem chhan hrang hrang zirchianna neihin iskut chingtute tan beiseina thar a pek ngei a beisei tih a sawi.
Iskut an thar chho zel a nih chuan market fel leh system felfai taka luhpui an tum dawn tih sawiin agriculture ninster chuan, farmer tan tharchhuaktu nih bakah a hralhna buaipuitu an ni kawp chu a hna hnihin an tan a hautak a. Farmer-ten an tharchhuah sa pawh a hralhna anmahni bawkin buaipuiin sorkarin a buaipui ngai lo tih sawiin, “Keini chuan kan thlai tharte lilamna tur platform siam kan tum a, market platform kan siam hunah chuan tun hmaa in harsatna thin hi sutkian a nih thuai kan beisei,” a ti.
PC Vanlalruata chuan sorkarin a lo tiam tawh angin support price hmangin kg-ah Rs 50-in a laksak mek a. Tunah hian sawhthing hi vai ramah kg-ah Rs 25 te, Rs 30 te a nih mek thu a sawiin, Mizoram pawna thawn chhuah zahpuiawm sawhthing fai leh tha tak kuthnathawktute atanga hmuh an inbeisei tih a sawi.
He hun hi R.Vanlalzauva, Director, Mission Foundation Movement chuan a kaihruai a, Project Coordinator HL Rinawma’n zirchianna kalpui a nih dan leh hmalak mek a nih dan a sawifiah bawk.