Aizawl: Rajya Sabha MP K. Vanlalvena chuan Zohnahthlak unau karah inhriatthiam lohna awm engpawh awm se silaia inkah hmanga sawi fel lovin inbiakna hmanga sutkian thin tur a ni tih thu a sawi.
Ningani khan K Vanlalvena chuan Chinland Council sorkar thuthmun Camp Victoria, Chin State-a awm chu a tlawh a. Zirtawpni khan Zokhawthar ral leh lama awm Khawmawi a tlawh bawk a. Hualngo ram sorkar (HPO) hruaitute nen an inkawm bawk.
Heng hmun a tlawhnaah K.Vanlalvena chuan Myanmar, India leh Bangladesh-a Zofate hi hnam hming leh tawng hrang hrang nei ni mah se, hnam khat an ni a. Pathianin chanchintha hril tura a thlan hnam an nih avangin an la ding chhuak ngei ngei dawn tih a sawi.
Zohnahthlakte chu an awmna hmun leh an tawngte hrang rih mah se, inpumkhatna hi an vawng reng tur tih sawiin, “Unau karah inhriatthiam lohna engpawh awm se, silaia inkah hmanga sawi fel lo vin, inbiakna hmanga sutkian thin tur a ni,” K Vanlalvena’n a ti.
K.Vanlalvena chuan, “Chin leh Mizo hi unau kan nih avangin ramri hung pawh |iau-ah ni lo vin, Chindwin lui kamah hung rawh se tih hi kan duh dan a ni. Myanmar nena kan ramri chu |iau a ni lo va, Chindwin a ni a, thlang lamah pawh Bangladesh phaizawl thlengin a ni,” a ti bawk.
Camp Victoria a tlawhnaah hian Chinland Council sorkar hruaitute leh Chinland sipaiten ramri atanga lo hmuak a. He hmunah hian K.Vanlalvena hi Pathanga, Chinland Chief Minister leh Chinland Minister-te leh sorkar mipawimawh dangte bakah CNF Army hotute nen inkawmin, Camp Victoria thuthmun Chinlung City hmun pawimawhte an fang ho.
Hualngo ram sorkar (HPO) a tlawhnaah hian Lallawmzuala, Vice President HPO-ten dawngsawngin sipai hruaitute leh council hotuten an lo tawiawm bawk a, damdawi inte leh sikul hmun hmate an lo fan kualpui bawk.
MP Rajya Sahba hi MNF General Headquarters atangin hruaitu eng emaw zatin an tawiawm a. Chin State-a mi pawimawh Aizawla awm thenkhatten an tawiawm.