FIH Pro League an khelh zawh hnuah India mipa leh hmeichhe hockey team-te dinhmun a chhe lem lo hle a, FIH World Ranking chhuak thar berah Top 10 huangah an la awm ve ve a ni.
India hmeichhe team chuan FIH Pro League an khelhah world champion Netherlands, Australia, England, Germany leh Spain an hmachhawn a. Mipa team pawhin England, Germany, Spain leh Ireland te an hmachhawn ve bawk a ni.
Ranking chhuak thar berah hian mipa team chu 5-na niin, hmeichhe team chu 9-na an ni bawk a ni.
FIH Hockey Pro League hi hmun thum – Sydney, Australia; Bhubaneswar, India leh Santiago del Estero, Argentina-ah te an khel a ni.
Pro League bakah FIH Hockey Men’s Nations Cup 2 chu Oman-ah an khelh bakah FIH Hockey Women’s Nations Cup pawh Chile-ah an khel bawk.
Heng tournament-ah hian India team an che chhe lo bawk a, ranking-ah an san theih phah.
Hmeichhe ranking-ah Netherlands (3639) chu a chungnung ber an ni mek a, 2-na chu Argentina (3223) niin, 3-na chu Belgium (3039) an ni a. An hnuaiah hian China (2734), Australia (2696), Germany (2662), Spain (2583), England (2440) leh India (2391) te an awm a ni.
Mipa ranking-ah chuan Olympic champion Netherlands (3241) chu an sang ber a, Belgium (3123) leh England (3061) te chu an hnuai chiahah hian an awm a. World champion Germany (3053) leh India (2978) te chu a dawttu an ni a. An hnuaiah hian Australia (2824), Spain (2716), Argentina (2682), France (2116) leh Ireland (2091) te an awm bawk a ni.