Aizawl: March 23, 2023 atanga May 3, 2025 chhung khan Lengpui Airport-a mitthi ruang lo thleng thlahna neih tawh zat chu 203 a ni.
Inrinni khan Lengpui Airport Chapel-ah The Salvation Army India Eastern Territory kaltlanga rawngbawlna pawimawh tak kengkawhtu, Airport Chaplain hnathawh hriatpuina inkhawm neih a ni.
Airport Chaplain hna chelh mektu Captain F. Vanlalringa chhinchhiah danin, March 23, 2023 atanga khan Inrinni thlengin Lengpui Airport-a ruang lo thleng thlahna neih tawh chu 203 an ni a, heng bakah hian damlohna avanga phai lam pan tur te leh zin veivakte an mamawhte chu tawngtaina neihsak thinin, Airport chhung leh pawna tanpui ngaite chu an mamawhna ang zela tisa leh thlarau lamah tanpui thin an ni.
Airport chaplain rawngbawlna hi The Salvation Army Officer pangaten an lo thawk tawh a. Chapel-a hman turin tlawmngai pawl, Foundation For Drug-Free Mizoram President V. Lalnunthara’n lectern thar a pek chu hlanna neih nghal a ni a, Airport Chaplain hnathawh hriatpuina thuziak leh pangpar a hlan bawk.
Lengpui Airport-ah hian ruang rawn thleng hmuaktu nei mang lote an awm chang a awm thin a, chung mite ruang khuhna tur leh pangparte chu mi bengvar ten Airport Chaplain kaltlangin an lo pe tawh thin bawk.