Aizawl: Lunglei Municipal Council (LMC) Board of Councillors (BoC) thukhawm chuan sorkar kum kal mek, 2025-2026 atana LMC sum ruahmanna Rs nuai 2,463.97 (Rs 24,63,97,208) a pawm.
Zirtawpni khan LMC BoC hi an chairman Lalzuithanga kaihhruaiin BoC Meeting Hall, Convention Centre, Lungleiah an thu khawm a. |hutkhawmah hian Finance changtu Executive Councillor Zorinsanga Hmar chuan kum 2025-2026 atana LMC sum ruahmanna, Rs nuai 2,463.97 chu pharhin, sawiho a nih hnuah lungrual taka pawm a ni.
Sorkar kum kal meka LMC budget-ah hian Tax and Non-Tax Revenue atangin Rs nuai 2,086.73 (Rs 20,86,73,000) leh Capital Receipts-ah Rs nuai 377.24 (Rs 3,77,24,208) hmuh beisei a ni.
LMC BoC thu khawm chuan kumin 2025 atang hian LMC area-ah Garbage Free City Lunglei Project kalpui tura relin, LMC ward number 1, 2, 9 leh 11 te pilot project atan ruahman a ni a. Kum tin ward dangah kalpui belh zelin, kum thum chhungin ward 11 tuam chhuah tum a ni a. State sorkar sum leh Urban Local Body sum atanga hma lak dan ngaihtuah ni se, an ti.
Mizoram sorkarin LMC chu property tax 2024 -2025 khawn phalna a pek tawh angin, inbuatsaih mek a nih thu tar lan a ni a. Property tax khawn tur chungchang hi mipuiah inhrilhfiahna neih hmasak ni se an tih bakah, Property Tax khawn dan tur inkaihhruaina siam rem nghal a, property tax atanga sum hmuh chu Ward Committee kal tlangin Ward tina hmasawnna hmasawnnan zaa 80, Local Council kal tlanga hmasawnna hna thawh nan zaa 15 leh LMC-ah zaa 5 kal tura siam rem a ni a. Dan hmasaah chuan Ward Committee-ah zaa 80, LC-ah zaa 5 leh LMC-ah zaa 15 tih niin, LMC leh LC te chanpual hi thlakthleng a ni.
LMC Board of Councillors thut khawmah hian elected councillor 11 an tel kim a. LMC Chief Executive Officer Donny Lalruatsanga leh Secretary Zoramdini te’n an telpui bawk.