Aizawl: Tun hnaia vawk hri African Swine fever (ASF) leng thar leh avangin nimin khan vawk 97 an thi leh, ASF vangin vawk 55 suat a ni bawk.
Nimina vawk thite hi Lawngtlai district-a Kawlchaw West-ah 29, Sihtlangpui-ah vawk 13 an thi a. Siaha district-a College Vaih-II, Siahatla-II, Tipa V-I leh Tipa V-III-ah vawk pakhat theuh, College Vaih-III, New Colony-II leh Kaichao E-I & II-ah pahnih theuh bakah Meisatla-II-ah pali, Tisopi-ah 20 leh Amobyu B & Ch-ah 21, a vaiin vawk 97 an thi.
Vawk suat zat hi Siaha district-a Siahatla-II leh Tipa D-II-ah pahnih ve ve, New Colony-III pariat, Siaha Vaihpi-III-ah 13 leh Tipa V-I-ah 30, a vaiin 55 an ni.
AH&Vety department chhinchhiah danin kumin January atanga nimin thleng khan Mizoramah hri leng avangin vawk 4,368 an thi tawh a, suat tawh zawng zawng zat hi 1,335 niin, district pali – Mamit (thi 173, suat 48), Lawngtlai (thi 1,589, suat 386), Siaha (thi 2,532, suat 647) leh Lunglei (thi 74, suat 54)-ah te vawk hri leng nia hriat a ni. Hetih lai hian, khaw 60-ah hri leng avanga buaina tawh a ni.
December 24, 2024 atanga ni 80 chuang ASF vawk pul hri avanga vawk thi leh suat a awm tawh loh hnuah, kumin March thla laihawl vel khan vawk thi report dawn a nih leh tak avangin, vawk thi leh damlote sample endik hnu chu Guwhati laboratory-ah thawnin, March thla khan ASF vang a ni tih a rawn finfiah ta a ni.