Aizawl: MNF Sr. Vice President Dr. R.Lalthangliana, MLA chuan AMC inthlan lo awm tur atana MNF official candidate-te tan Nilaini khan Ramthar veng leh Ramhlun North campaign-in hun a hmang.
Veng pahniha hun a hmanah thu sawiin Dr. R Lalthangliana chuan, tuna Aizawl khawpui chhung kawng pawimawh zual resurfacing hna thawh mek chu lawmawm mah se, inthlan campaign laia chief minister Lalduhoma leh a hoten an duh loh leh sawisel nasat em em restricted tender hmanga ZPM sorkarin a thawhtir tih a sawi a. Lalduhoma leh a pawlte chu inthlan campaign laia an sawi loh ang hlira awmah puhin, “Enchhin fuh lohzia nasa takin mipuiin kan hre tawh a, AMC-ah hi chuan enchhin tawh lo ang u, Aizawl khawpui hmasawnna turin MNF candidate-te thlangtling turin ka ngen che u a ni,” a ti.
Dampa bialtu MLA ni bawk hian Aizawl khawpui chhung kawng hi eng sorkarah pawh a khat tawka thuamthat reng thin anih thu sawiin, “Tuna ZPM sorkarin kawng a thuam that mek hi chu, ZPM hian central atanga pawisa a hmuh emaw, loan emaw, budget emaw, petrol leh diesel cess an khawn pawisa atanga siam a ni lo va. MNF sorkar hmasain, A-T-L road, world bank project contractor a ban security chhuhsak, pung awma an khawl, Rs vbc 90.69 lo tlingkhawm atanga siam a ni,” tia sawiin, ZPM sum thawhchhuah atanga siam a nih loh thu a sawi.