Aizawl: Centre for Environmental & Social Justice (CESJ) chuan Aizawl Bazar Bungkawn leh Dak Inpui inkar kawng tihzauhna tura sorkarin Lammual chhehvel kawngpui hnaia ding thingkung eng emaw zat kih tura hma a lakna chu Ningani khan an dang chhunzawm.
CESJ hruaitute chuan sorkarin thing kit zawnga kawngpui tihzauh a tumna chu tha lo an tih thu an sawi a. Kawngpui zai tha leh nuam chu an duh tho rualin, helai hmun zim têa thing 176 lai kawng tihzauh nana kih hian Aizawl khawpui traffic tawt a tihziaawm phah an rin loh thu an sawi a. Thih huamin an dodal zel dawn tih an sawi.
Sorkarin thing kih tur a chhinchhiah 176-te hi venghim turin thih huamin an tang dawn tih sawiin CESJ hruaitute chuan India-ah thing humhalha hmalakna lian tak tak a lo awm tawh a, Assam Rifles-in Lammual leh a chhehvel an chhuahsan hma deuh khan thing awmzat chhiarna an neih thu a sawi a, thing 480 vel an chhiar a, chung zingah chuan khawvela thing vang tak tak leh boruak tha (oxygen) pe chhuak hnem tak takte pawh a awm a, thih huama an hmalaknin awmzia a neih loh chuan court hial pawh an kal dawn tih an sawi.
Hmasawnna hnathawh an dodal hrim hrim a nih loh thu sawiin, kawng tihzauhna tura thing kih aiah phunsawn mai tura PWD an ngen thu leh thing chu kit kher loa lirtheiin an hel mai theih tura kawngpui tizau zawk tura an ngen thu an sawi bawk.