Aizawl: MUHCS 2.0 hmang turin sorkar hnathawk leh mipui nawlpui man chawia inziak lutten card an neih hmasak a ngai.
April 1, 2026 atangin MUHCS 2.0 chu hman tan a ni a. CSS/GIA, Pensioner leh AB PM-JAY (Golden Card) hmang thei tan tun dinhmunah MUHCS Card siam a la ngai lo a, sorkar hnathawk leh mipui nawlpui man chawia inziaklut te erawhin MUHCS Card an siam a ngai thung a ni.
CSS/GIA leh Pensioner-te hian MUHCS Subscription form hmangin MUHCS hnuaiah enkawlna an dawng thei a, AB PM-JAY chhungkuate chuan Golden card hmangin MUHCS hnuaiah enkawlna a dawng thei dawn bawk.
MUHCS Card-hi Common Service Centre (CSC) hnenah emaw MUHCS hmang thei damdawi inah te damdawi in luh rualin siam theih a ni a, online hmangin mahnia insiam theih a ni bawk.
Hetih lai hian Mizoram State Health Care Society, Chief Executive Officer Dr. Lalhriatzuali Ralte chuan Nilaini khan thuchhuah siamin, MUHCS 2.0 hnuaia mipui nawlpui (General Beneficiary) te man chawia inziah luh hun April ni 15, 2026 thleng kalpui tura lo puan tawh chu May ni 15, 2026 thleng pawh sei a nih thu a puang.
Governing Body, Mizoram State Health Care Society thurel (Dt. 13.4.2026) ang leh State Election Commission in lehkha (Dt.14.4.2026) a mipui hriattir phalna a pek angin, MUHCS 2.0 hi pawt sei an nih thu tarlangin, he mi hun chhung hian mipuite (General Beneficiary) inziak lut vek tura ngenin a hriattir bawk.
Inziah luh hun pawh sei a nih avangin grace period erawh hawn a ni tawh lo ang.