Thutak Nunpuitu Team (TNT)-in an player rinrawl eng emaw zat an kawl zui theih loh avangin team thar an din a, hnam dang player la lut lovin thla thar atanga khelh tur Pro Volleyball League an hmachhawn dawn.
Riak lutin an hmunpui, Muanna Vengah TNT an inpuahchah a, kum dang aia chona sang zawk hmachhawn ngai dawn mah se an phur tlang tih team enkawltu zinga mi, Vanlalmuanpuia’n a sawi a, an huphurh lo.
Kum 2023 khan TNT-in an vanglai hmanguin Mizo hlanga Pro Volleyball mipa champion hmasa ber an ni a, he team hian kum 2024-ah beisei pha zui lo mah se nikumah final lutin Anastasia Electric Veng an hneh zo ta lo a ni.
Kum kal ta khan an player langsar ber, Vanlaltanchhana leh rinrawla an hman zinga mi, Zodingliana’n Mizoram Police an zawm a, rawngrut lai an nih avangin an chhawr theih an ni dawn lo.
Anni bakah hian team tichaktu leh blocker tha, Zosangzuala’n Anastasia a zawm a, kum khat an kawl hnuah a chawr chhuahna, Tuichangralah Saidingpuia Sailo a kir bawk.
Team captain Vanlalchhantluanga Sailo hovin team an din thar leh a, Pro Volleyball League-a tawnhriat nei tawh, Hunthar player hlui, Rohluzuala leh Theiriat Lunglei spiker Lalhriatpuia la lutin nikum lama an chhawr tam loh, Lalsaitluanga leh Ramdinthara te chu rinrawlah an hman a ngai a, Tlangsam atangin season liam taa an hman theih loh, Laldinchhunga koh kir an tum bawk.
Muanpuia chuan an tana pawimawh ber chu player-te thlarau nun a ni a, chumi a fel tawh chuan huphurhawm a awm loh thu a sawi a. Kum dang ang bawkin team tihchakna tur hnam dang player an ngaihven lo va, a lakna tur sum an nei loh avangin Mizo hlanga khel leh turin an inbuatsaih tih a sawi.
Kum 2016-ah Pro Volleyball tannin TNT-in Mizo hlangin final lut nghal mah se nikum ang bawkin Anastasia an hneh lo va, pahnihna ni chungin championship hmasa ber an lo thlah liam tawh a ni.
A tir atangin tlak hniam nei miah lovin Mizoram volleyball inelna sang berah an la tel kim vek a, kum tinin boruak nei lian leh league tihlutu ber an ni.
Hmel thar puin fiahna danglam an hmachhawn dawn a, May 11-ah Pro Volleyball League tan a ni ang.