Naktukah Aizawl khawpui enkawl kawnga hmalatu tur Aizawl Municipal Corporation (AMC) a kan aiawh tur thlanna neih tan a ni dawn ta a, ward hrang hrang chuh tur awmah state a rorellai ZPM leh opposition party Congress leh MNF te chuan seat awm zawng zawng chuh kimin, BJP in seat tlema zawng an chuh ve bawk a, inthlan kaihhnawihah boruak duhawm lo thleng hriat tur a awm rih lo bawk.
AMC hi kan neihna la rei lo mah se, khawpui enkawl tura din a nih miau avangin ngaihthah ngawt chi a ni lo a, party tinte pawhin khawpui chhunga an dinhmun tur thui tak hril thei a nih avangin beihpui an thlak nasa hle bawk. Tuna chak tuma kan campaign dan atang hian kan tih tak tak zia pawh a hriat theih awm e.
Rorel lai ZPM lamin AMC-a thlan tlinte chu state sorkar nena thukhatvuaa kal thei tur an nih chuan hmasawnna hna a chak tur thu an aupui nasat viau laiin, eptu party lamin AMC sum tam ber chu sorkar laipui atanga lo kal a nih avanga state-a sorkar lai thlan tlin kher a tul loh thu an aupui thung a, Aizawl khawpui hmel tihdanglam chu eptu lam auhla ring pawl a ni bawk.
Tluang taka vote thlak theih a nih chuan kar khat hnu velah vote tlate hi chhiar nghal a ni dawn a, chumi hunah chuan AMC a rorelna chelh tur pawh a hriat theih tawh ngei ang. Tute pawh lo tling se an tha vek mai a. Mahse, kan campaign laia kan auhlate hi mipuiin min chhinchhiahsak reng tih theihnghilh lo ila, kan thusawi hmangin vuak let kan ni dawn tih hriain, a tihhlawhtlin kawngah hma la nghal thei ila, politician thusawi mai maiah ngaihsak kan nih loh nan rin ngama hnathawh i tum ang u.