BJP Mizoram chuan Aizawl Municipal Corporation (AMC) inthlan tluang taka zawh a ni ta chu lawmawm an tih thu an sawi.
Nimina an thuchhuahah BJP Mizoram chuan, Aizawl tha lehzual beiseia BJP candidate vote-tu zawng zawng te chungah lawmthu an sawi a. Vote thlak hi India khua leh tui nihna-a an chanvo pawimawh tak a nih avangin vote thlak hi an tih makmawh a nih thu an sawi.
Mizoram mipuiin tunah chuan vote thlak pawh an uar sawt tih sawiin BJP Mizoram chuan, “Politics-in a nghawng phak loh pakhat mah kan awm lo va, election hi kan hma lam hun thui tak hriltu a nih avangin politics ruih chilhna bansana rilru fim tak nen vote kan thlak a hun ta hle a ni. Chuvangin mahni intodelh lo leh thawhchhuah mumal nei lo state kan nih avangin, kan khawsak pawh a harsa hle a, rethei leh hausa kar zau ta lutuk te a reh theih nan kan ram enkawl tura kan thlan turah ngun taka ngaihtuahna seng turin Zoram mipuite kan sawm che u,” an ti bawk.