US President Donald Trump-a chuan Iran nena inkahhai chu pawh sei a nih tur thu a puang a, Tehran-in indona tihtawp tura rawtna a siam theihna turin hun tam zawk pek a nih theih nan US sipaite chuan beih an tum chu an titawp dawn tih a sawi.
Inkahhai hi Nilainia tawp tur kha a ni a, Pakistani palaiten an ngen angin pawi sei tum a ni tih Trump-a chuan a sawi.
“Hetih rual hian kan Sipaite chu dan chhunzawm zel turin ka hriattir a, kawng dang zawng zawngah chuan inpeih leh theihna nei reng turin ka hriattir a. Rawtna an thehluha sawihona an zawh hma chuan inkahhai hi ka pawt sei ang,” tiin US president hian social media-ah a tar lang a ni.
A pawh sei hun chhung hi Trump-a hian a sawi lo va, US lam atang chuan titawp thei reng a nih thu tar lan a ni.
Trump-a thusawi hi Iran-in a la chhang lo va. Tasnim news agency chuan Tehran dinhmun hi ‘thuneituin a hnuah a puang ang’ tih a tar lang thung.
Inkahhai pawh sei hi White House atanga thu inthlak thut a ni a. A hma lawkin social media-ah Trump-a hian inkahhai tihsei chu a duh loh thu leh Iran an hun a liam a, US-in nasa takin a beih dawn niin a vau a ni.
Trump-a’n a vau lai hi Iranian thuneituten US lawng sipaiten an ram lawngchawlh hmun a dan an dem thu an sawi lai niin inbe tura an kal pawh a rinawm loh lai a ni.
Hemi hnu hian Pakistani Prime Minister Shehbaz Sharif-a chuan Trump-a’n inkahhai pawh sei a remtih avangin lawmthu a sawi a, Islamabad chuan inbiakna hmanga buaina chin fel dan tur a nawr chhunzawm zel dawn tih a sawi.
February 28-a US leh Israel tang dunin Iran an beih atang khan Iranian thuneitu sang tam tak an thi tawh a, Supreme Leader Ali Khamenei pawh a tel.
Heti chung chuan Tehran-a rorelna kalphungah hian inthlak danglamna lian tham a awm lo a, Islamic Revolutionary Guard Corps (IRGC) chuan indona hi an kaihruai a ni.
Khamenei aiah hian a fapa, Mojtaba a awm a, thla hmasaa supreme leader atana thlan a nih hnuah mipui hmaah a la inlan lo.
Iran leh US hian April 8 khan chawlhkar hnih chhung inkahhai an remti a; mahse, Strait of Hormuz chungchang leh inkahhaiah Lebanon telh leh telh loh chungchangah inrem lohna a awm zui reng tho.
Indona tihtawp nan US chuan Iranian nuclear program tihtawp vek a tum bakah missile siam chhuah tihtlem leh a thenawm hnaia Hezbollah leh Hamas a thlawpna tihtawp a tum bawk.
Tehran hian civil nuclear programme kalpui mek zingah ram chhunga uranium tihchak theihna dikna a neih chu a sawi ve thung a. Sipai theihna leh a thawhpui pawlte chu inbiaknaa hman a theih loh thu a sawi bawk.