Manipur sorkarin Right to Information (RTI) zawhna a chhannaah May 3, 2023 atanga kumin March 30 thleng khan Manipur-a hnam hrang hrang inkara buaina chhuak vangin mi 58,881 chu an awmna kalsanin hmun him dangah an insawn.
Sorkar hian Thawhtanni khan an chhinchhiah zat hi a pe chhuak a, nikum September thlaa Manipur atanga Congress hruaitu, Hareshwar Goshwami-a’n Meitei leh Kuki-Zo inkara Manipur-a buaina chhuak vanga raltlante dinhmun chungchanga hriat duhna RTI a thehluh chhanna a ni.
Manipur-a buaina a chhuah tirh atanga internally displaced person (IDP) awm zat chungchanga Goshwami-a zawhna chhangin home department chuan kumin March 30 thleng khan Manipur-ah hian mi 58,881 an awm tawh tih a sawi.
RTI chhanna chuan tunah hian in chhe vek 7,894 leh thenkhat chhia 2,646 a awm tih a tar lang bawk a, hei hi May 3, 2023 atanga in chhe vek leh a then tihchhiat zat a zawhna an chhang a ni.
May 3, 2023 atanga Manipur buaina chhuak vanga thi leh hliam zat zawhna siamah sorkar chuan thi zat hi 217 a nih thu a sawi a, hei hi an chhungte hnena zangnadawmna pek zet ang a ni.
Hnam hnih inkar buaina chhuakah hian mi 260 chuang an thi tawh anga ngaih a ni thung a. RTI zawhna chhanna hi sorkarin an chhungte hnena zangnadawmna a pek chhuah tawh chin chauh a sawi a ni.
Sorkar chuan kumin March 10 thleng khan state chhungah relief camp 174 a awm a, a vaiin Manipur Police Housing Corporation (MPHC) Limited-in in 3,000 an sa tawh tih a sawi bawk.
Zawhna chhannaah hian relief camp kalpui nana home affairs ministry-in special assistance pek tura a pawm chu Rs. vaibelchhe 424.36 a ni a, heng zinga Rs. vaibelchhe 217.4 pek tawh a nih thu tar lan a ni a. Deputy Commissioner (DC)-te hnenah a vaiin Rs. vaibelchhe 284.6 pek chhuah tawh a ni.
Special package for rehabilitation and resettlement of internally displaced persons (IDPs) hnuaiah ministry-in pek turin Rs. vaibelchhe 523 a pawm tawh a, Rs. vaibelchhe 124.50 chauh a la pe chhuak thung.
Hei bakah hian DC-te hnenah a vaiin Rs. vaibnelchhe 65.1635 pek chhuah a ni bawk a. Hei bakah hian state scheme hnuaiah mattress leh mi mal thil lei nana puihna atan Rs. vaibelchhe 14.24 pek a ni bawk.
RTI hmanga zawttu chuan, “Zawhna zawh zinga pakuaa, 30–40% velin a lungawithlak lo va, a bak 60% pawh hi a then chauh lungawithlak a ni,” tiin a sawi.
Goshwami-a chuan ministry chuan relief camp kalpuina tur special assistance leh IDP-te rehabilitation leh resettlement atana special package dang pekna tur sum a pawm tawh thu leh sanction tawh thu a sawi.
Hetihlai hian Manipur Information Commission (MIC) chuan Thawhlehni khan Manipur home department chu state-a buaina chhuak atanga IDP chhuakte tan ni 15 chhunga state level-a information kimchang pe turin a hriattir.
He thupek hi State Information Commissioner Nungshitombi Athokpam-a chuan State Public Information Officer (SPIO) leh home department thuneitute laka Hareshwar Goshwami-a’n appeal case thehluhin thuneituten relief camp, thihna leh IDP-te hriselna dinhmun chungchang a zawhna chu a duh ang chhanna an pe lo nia sawi a ni.
Commission chuan Manipur home department chu nodal authority a nih angin data kimchang pe turin a hriattir a, RTI Act hnuaiah information chu puan chhuah theih a nih thu a sawi bawk.