Khawvela football inelna lian ber khelh hun a hnai zel a, FIFA-in World Cup ticket a zuar chhuak leh chu mipui tan phurawm aiin beidawnthlakah a kal zawk.
Nilaini kal ta khan khawvel huapa football thuneitu sang ber chuan ‘last-minute ticket phase’ tiin ticket zawrh thar an puang a. Inkhel 104 atana ticket-te chu a che hmasa sa leitir theih a nih thu an puang a. A hmaa category pathum hawn tawhah leh thla kaltaa an telh thar, ‘front category’ manah a lei theih dawn.
December-a zawrh chhuah tirh atang tawhin ticket man to lutuk vangin fan-te an lungawi lo tawh hle a. Final ticket to ber chu $11,000 dawn a ni a, tun tuma ticket zawrh tharah hian infiamna khawvela inelna ngaihven hlawh berah hian ticket man chungchanga FIFA-in ‘dynamic ticketing’ a hman chu sawisel hlawhna bulpui a ni em tih a ngaihtuah theih.
Canada, Mexico leh United States-in an thlen tur inelna ticket man hian sawi a hlawh a, eng vanga a man tito vak nge a ni?
- Zawrh that chhan
A lan danah chuan a hmain vawi li lai ticket zuar tawh mah se FIFA hian ticket hralh bân a la ngah hle a, chungte chu inkhelh tan hma ngeia hralh zawh vek an duh a ni.
Kum 1994-a US-in a thlen khan entu mipui maktaduai 3.5 an awm a, kumina inelna hian a khum ngei beisei a nih thu FIFA hian an sawi nawn fo na a, ruahman lawk loha a vawi nga nana ticket zawrh leh hi chuan thil dang a kawk.
Hetianga rin loh taka ticket zawrh leh a nih hian ticket zawrh dan ruahmanna chuan zawhna a siam hnem hle a. A hmain April 1-a ticket zawrh kha ‘a vawi lina leh a tawpna ber’ leh inelna zawh thlenga inhawng tur a ni tih an sawi vang a ni.
Amaherawhchu, FIFA palai pakhat chuan, “He ticket rawn chhuak hi last-minute sales phase kal mek, inelna tawp thlenga awm tur zinga mi a ni a, mipuiten FIFA.com/tickets-ah an lei thei ang a, a hmasa sain an lei thei ang,” a ti.
“Heng ticket bakah hian mipui hnenah July 19 final match neih hma chu ticket hralh tur a awm a nih chuan zawrh belh zel a ni ang,” a ti bawk.
- Hralh harsat chhan
A chhanna langsar ber tur a hmaa an tiam aiin a to vang a ni.
Thla hmasaah khan Football Supporters Europe (FSE) chuan North America-ten an dil hmasak ber tumin ticket hi a tlawm ber $21 atanga lei theih turin an tiam tih an sawi a. Mahse, a taka ticket tlawm ber chu $60 a ni a, chu pawh chu tlem chauh a ni a. Heng ticket-te hi inkhelhna hmun tlem te atan chauh ruahman a ni a, ticket a to lutuk tia sawiselna nasa tak a awm nghal avangin December khan a man tlawm zawka chhawp chhuah a ni.
Hralh a tlem chu a to lutuk vang nia an sawi chu FIFA chuan a hnawl thung.
“FIFA World Cup ticket hralh dan hi a la tha reng a, inkhel ngaihventu an la tam hle a ni,” tiin an palai chuan a sawi.
- Eng zat man vel nge?
December-a zawrh tan a nih khan a man chu category 3 atan $140 atanga tanin final match atan $8,680 thleng a ni.
April 1-a zawrh leh a nih khan $10,990 laiin a to va, hei hi North America-in he inelna thleng tura an dil tuma a man to ber tura an ruahman, $1,550 aiin let sarih dawnin a to zawk a ni.
- Eng vanga to nge?
Mi thiamte chuan ticket to chhan hi thil hrang hrang vang niin an sawi a, a lian ber chu inkhel 104-a 78 lai US-in a thlen tur hi a ni.
“US-a World Cup nghah a nih chhan lian ber pakhat chu sum lak luh theihna remchang lian tak a awm vang a ni,” tiin Shanghai-a Emlyon Business School-a Afro-Eurasian sport professor Simon Chadwick chuan a sawi.
Infiamna khawvela mi thiam chuan FIFA hian US-a kum eng emaw zat an lo hman tawh thin ‘dynamic ticket pricing model’ chu an hmang ngei niin a ring a ni.
“US-a infiamna ngainatute hi chuan a hun laia ticket man tihdanglam hi ngaiah an nei tawh a, hei hian luh man a tisangin a titlawm thei ve ve a ni,” a ti.
“A man sang bera an hralh chuan dynamic ticketing chu sum tam thei ang bera lak luh tumna a ni tih a chiang hle ang a, FIFA hian kumin nipui laia inelna atang hian a theih anga tam sum hmuh chhuah an tum a ni,” tiin Chadwick chuan a sawi.
“A buaina chu hetiang kalphung hian entu mipui thenkhat chu ticket to vangin a hnawt tiau thei a, entu mipuite chu mi hausa leh khawsak nuamsa zawk hlir an ni mai thei a ni,” a ti bawk.
- Dynamic ticketing chu
Dynamic pricing tia hriat bawk hi thil zawrh dan kalphung pakhat a ni a, ticket man a nghet lo a, mipuiin an mamawh dan, a awm zat leh a hun hman dan azirin a hun lai ang zelin a inthlak danglam thei a ni.