- Lalremliana Pachuau
Entawntlak takin Zorama kohhran lian ber Synod chuan an kohhrana mi harsa zual, Mizoram Universal Health Care Scheme-a inziak lut thei lote tân pawisa a chawisak mek a. He an thil tih hi a chhuanawmin a Pathian thu hliah hliah a nih hi. He an thil tih, an hmalakna hi kohhran dangte leh Branch YMA tinte hian bawhzui ve thei se a va tha dâwn êm!
Kan hriat angin Tualchhûng Kohhran tinte hian Evelope Head pakhat; Relief kan nei a. Chuta pawisa tling khawm kal tlangin, kan kohhran mi leh sa dam lo damdawi ina awmte a kan thin. Kohhran tinin tanpuina pawisa kan pêk zat a inang lo. Thenkhatin cheng 1500, 2000, 3000 an pe thin a nih hi. Kan kohhran hian thla tin dam lo kanna pawisa a theh chhuak thin ang hian, kohhran dangte pawhin an tih ve a rinawm.
Kohhran tinah hian chhûngkaw harsa ve tak tak, nitina inhlawhfa an awm vekin a rinawm a. An tân cheng 2500 hmanga MUHCS-a inziah kha, a awlsam viau lo ang tih a hriat mai. Thla tina kohhranin dam lo kan nân pawisa a hman ral thin dan ngaihtuah hian, cheng 2500 hmanga cheng nuai 5 thleng a thlawna inenkawlna va leisak kha a manhla êm êm dâwn tlat a ni. Kohhran mi leh sa zingah hetiang hmalakna hi thîk an awm pawh a rinawm lem loh.
A nihna takah chuan cheng 2000-3000 a kan inkan hian, mamawh a phuhruk theih hi a tam hle lo. Chu ai chuan a thlawna cheng nuai 5 thleng an inenkawl theihna tura pawisa sen kha, a finthlak zawk daih tih a lang reng a nih hi. Chuvangin, kohhran tinin awmze nei zawka a mi leh sate hnena tanpuina pêk chhuah dan a ngaihtuah hian, kawngro a sum em em zawk ngei dâwn a nih hi.
Chutiang bawkin Branch YMA kal tlangin, kum tawpah veng chhûnga mi harsa zualte pawisa faia tanpui thin an ni leh a. Veng tinah hian chhûngkaw harsa tak tak, an tân cheng 2500 hmanga MUHCS-a inziah luh mai harsat tak tak an tam ang. Chung mite tân Branch YMA tinte luang chhuak ta se, kum tawpa tanpuina an pêk thin aia lukhawng a neih len theih turzia kan hre thiam vek awm e.
Eptu Party pahnihin kawng hrang hrangin MUHCS hi sawisel thin mah se, a taka hmang tangkaitu apiangin he Scheme hi an fak zel a. He Scheme kal tlanga malsawmna an dawn thu tlângaupui tâwk an awm reng a nih hi. A taka hmang tangkaitute tân chuan, he Scheme hi a hlu thlawt reng a. Chutih laiin Sawrkar hnathawkte fuihpawrh tum tâwk an awm rengte hi, ngaihtuah chiang teh ang u.
Pay level sâng berte hian thla khata cheng 1500 an thawh a. Tichuan, an pay a zirin cheng 1000, 700, 400, 300 leh a nghet lova thawkte tân cheng 200 cut hi a nâ mawlh lo! Sawrkar hnathawkte hian income tax an pe lo a. An hlawh atanga chhuta pawisa tlem tê an thawh khawm kal tlanga, sawrkar hnathawk ve lem lote’n malsawmna an dawn han ngaihtuah hian, sawrkar hnathawkte hi phur taka he Scheme zawm zawk tur an ni.
Sawrkar hnathawkte hlawh atangin kuminah cheng vaibelchhe 26 leh nuai 42 a han tling khawm turte hi, mi mangangte’n an hman tangkai turzia ngaihtuahin lo uipui chiam chi em ni ngai? Eng hi nge sawrkar hnathawkte’n direct taka mipui tâna malsawmna kawng an hawn theih chuang le? An zara mi harsa tak takin malsawmna an dawn tur hi ngaihtuah chiang se, mi pangngai chin leh mi rilru herh uchuak tih lohte chuan, lawm takin pawisa an thawh ngei a rinawm tlat a ni.
Pensioner-te pawh an inngaihtuah that a tha khawp mai. Mi dang tâna malsawmna nih hi a Pathian thu em em si a. Mahni hmasialna khawvelah ringtu inti ve si, biak inah pawh inkhawm peih em em zingah, Zorama mi harsa zawkte tâna cheng 300-1500 thawh hreh tlat an awm a nih ngai chuan, a makin a uikawm thlak tih loh rual a ni lo! Pay hniam ber hlawh zat, a sâng ber hlawh zat han chhut hian, an thawh zat hi a tlem mah mah tih tur a nih zawk hi!
Tin, MUHCS sawisel zawnga thu leh hla nei rengtute hian, mi dangin hamthatna an dawn an itsik em ni tih mai tur a ni. Ni e, cheng vaibelchhe tam tak he Scheme-ah hian a kal ral duai duai ngei a. Mahse, englai mahin Mizoram Budget pumpui atang hian, Zoram mipuite hian kan hnena thleng phâk chan kan nei tak tak ngai lo. Capital Expenditure atanga indirect-a hamthatna kan dawn tam zawk lah, mi mal anga kan mamawh lem lohte an ni fur zel a nih hi.
MUHCS kal tlanga Budget-a sum dah kan lo chang ve hi, sawisel talh tum tur em ni ngai le? Mizoram budget atanga hnathawhna tur awm 17.46% han ngaihtuah hian, MUHCS lama sawrkar sum kal hi thîk chi a ni dâwn em ni? Mahni hmasialnaa khatte chauh lo chuan, rilru kawisawi an pu lo ang! Ministry pahnihte hnuaiah khân, a taka mipuite hnena thleng ngei Budget pharh a ni tak tak ngai em ni?
Mizoram hi mi dang tanpuina kawnga thawh hlawk tak thin kan ni a. Zo Inspiration te, Samari mi tha hnathawh han thlir chângte hian, mi thil phalte kal tlanga mi harsa tak takin lei rem an han rap ve theite hi, hmuh leh hriat a nuam em em a nih hi. Chuvangin Kohhran, YMA leh mi mal ang pawhin mi harsa zawkte tân MUHCS-a inziah luh theihna kawng hi hawng sup sup zawk ila. Tanpuina kut kan thawhin lukhawng a nei zawk ngei dâwn a lo ni e.