Aizawl: Mizoram Larsap General Vijay Kumar Singh chuan Assam Rifles hotute chu an theihna zawn apiangah Shalom Special School ngaihsaka chhawmdawl zel turin a chah.
Ningani khan Larsap hian Durbar Hall, Lok Bhavan, Aizawlah Shalom Special School, Serchhip zirlaite a kawm a. Zirlaite chu khawhai tizau tur leh, school hung chhung piaha tawnhriat an neih nan tia study tour an buatsaih chu lawmawm a tih thu a sawi a. Zirlaite hmangaih taka enkawl thintu zirtirtu leh nu leh pate chhuanawm a tih thu sawiin, tour chuan school leh zirlaiteah hmasawnna duhawm tak a thlen a beisei thu a sawi a. Assam Rifles hotute chu an theihna zawn apiangah school ngaihsaka chhawmdawl turin a chah.
An inkawmnaah hian zirlaite hian larsap hnenah thilpek an hlan bakah study tour chu nuam an tih thu an hrilh a. An school chungchang leh tour hlimthlate an thlir ho.
Shalom Special School, Serchhip hi August 17, 2005 khan chief minister hlui, Lal Thanhawla’n a din a. Tuna an school building ni ta sakna tur lungphum hi Mizoram larsap hian Eastern Army Commander anih lai, January, 2010 khan a phumsak a; 4th Assam Rifles-ten Military Civic Action kaltlangin an saksak a ni.
Shalom Special School-ah hian vohbik zirlai 36 an awm mek a ni.