Aam Aadmi Party (AAP) chuan Rajya Sabha chairman, Vice President CP Radhakrishnan-a leh President Droupadi Murmu-i te hnenah an Rajya Sabha MP pasarihten Zirtawpnia party chhuahsante lakah action lak an dil an tum tih an hruaitute leh thil hrechiangtuten Inrinni khan an sawi.
AAP hruaitute chuan Punjab-a assembly inthlanpui neih hma kum khat pawh a tling tawh lovah an hruaitu pawimawh thenkhatin an chhuahsan vanga an pawl chhunga harsatna awm thei tihtawp tumin an bei mek a ni.
AAP hruaitu hlun, RS MP Sanjay Singh-a chuan Radhakrishnan hnenah lehkha thawnin MP hel pasarihte chu rorelna in sang atanga disqualification an dil tur thu a sawi a. “Hei hi dan kalh, dik lo, dan kalh leh parliament dan kalh a ni… Rajya Sabha chairman, vice president zahawm tak hnenah lehkha ka thawn ang… heng Rajya Sabha MP pasarihte member nihna hi titawp turin ka ngen ang,” tiin Delhi-a thuthar lakhawmtute a kawmnaah a sawi.
Parliament chhunga hmalakna kalpui a tum lai hian party chuan danpui thlawhchhana hmalak a tum bawk a. Punjab Chief Minister Bhagwant Mann-a pawhin president hmuh a dil a, state atanga thlan tlin mi parukte chu ‘koh kir leh’ an phut niin thil hretuten an sawi.
Ram danpuiah hetiang dan hi a awm lo va. February thla khan Zirtawpnia MP hel zinga langsar ber, Rajya Sabha MP Raghav Chadha-a khan mipuiten an aiawha thlan che (active) lo lutukte chu an hun a zawh hmain voter-ten an pai hthlak theihna turin ‘Right to Recall’ hi a lo sawi chhuak tawh a. Punjab advocate general hlui, Ashok Aggarwal-a chuan, “Recall hi eng schedule hnuaiah mah danpuiah tlawhchhan a awm thei lo,” a ti.
Chadha-a hian ram rorelna in sang zawka AAP MP 10 zinga pasarih chuan party chhuahsanin BJP an zawm tih a puang a, hei hian Delhi-a thuneihna a hloh atanga kum khat hnuah AAP chu buainaah a hruai lut ta a. Party leh an hotu, Arvind Kejriwal-a hnathawh dan chungchangah zawhna a siam bawk.
MP hel zingah hian Chadha, Ashok Mittal, Sandeep Pathak, Rajinder Gupta, Vikram Sahney, Harbhajan Singh leh Swati Maliwal te an tel a. Chadha, Mittal leh Pathak te chuan Zirtawpni khan BJP an zawm a. Maliwal-i pawhin Inrinni khan a zawm thu a puang.
Zirtawpnia thuthar lakhawmtute a kawmnaah Chadha chuan BJP nen an inzawm dawn tih a sawi a. Singh-a erawh chuan anti-defection law hnuaiah venhimna a pe lo tih a sawi a. “Member pasarih emaw, a aia tam emaw pawh nise, hetianga mahni party kalsan hian dan ang a zawm lo,” a ti.
Hetih lai hian Inrinni khan AAP worker-te chuan Punjab-a Jalandhar-ah an MP-ten an party chhuahsana BJP an zawm avanga lungawi lohna an lantir a. Harbhajan Singh-a chenna in bangah ‘Gaddar’ (phatsantu) tih an ziak a. Phagwara-a Lovely Professional University (LPU) campus, Mittal-a ta main gate-ah pawh thu an ziak bawk.
Lungawi lote hi tual chhung AAP hruaituten an ho va. Kartarpur MLA Balkar Singh leh MLA hlui, Pawan Kumar Tinu-a kaihhruainain LPU-ah nawrh huaihawt a ni a, Jalandhar Mayor Vineet Dhir leh party hotu dang, Nitin Kohli-a te chu Harbhajan-a chenna in tualah an pungkhawm a ni.