Aizawl: Mizoram tlawha lo zin mek Union Minister of State for Home Affairs Bandi Sanjay Kumar chuan video conference kaltlangin Thawhlehni khan Siaha district chhunga sorkar department hotute a kawm.
Union Minister Bandi Sanjay Kumar hian Thawhlehni khan Siaha tlawh tur ni mah se, khuain a zir loh avangin ruahmanna tidanglamin, MINECO Secretariat Conference Hall, Aizawl atangin Siaha district-a sorkar deparment hotute hi a kawm a. Siaha District Bawrhsap VL Hruaizela Khiangte hovin head of office leh MADC Official ten DC Mini Conference hall, Siaha atangin an lo chhim a ni.
An inkawmnaah hian department hotuten district chhunga hmalakna hrang hrang an sawi fiah bakah, an hnathawh meka harsatna an tawhte an thlen nghal a. Cross border chungchang bakah thenawm ram te nena insumdawn tawn chungchang te, ruihtheihthil leh puakthei thil lakluh chungchangte bakah zirna leh hriselna lama district dinhmun leh chawikan zel dan tur te an sawi ho a ni.