Aizawl: Chief Minister Lalduhoma chuan party leh party inkara thu inchuh a awmin NGO-ten ngawih an chuh thiamte a tha tih a sawi.
Dawrpui Multipurpose Hall-ah Mizo Student’s Union (MSU) in an pawl kum 25 tlin (Silver Jubilee) an lawmna Nilainia an buatsaihah hun hmanpuitu, chief minister chuan Mizoramin NGO a ngah a, a nei tha ber pawl an ni a. Pawl hruaitute hian pawl thil tum sirah mahni hamhaina an lo kalpui lutuk hian thil fel lo a lo chhuak mai thin tih sawiin, MSU chu thil tum tha tak nei pawl an nih ang ngeiin an thil tumte tihlawhtling tura theihtawp chhuah zel tura ngenin, “Party leh party inkara thu inchuh a awm lai phei chuan NGO ten ngawih an chuh thiamte pawh hi a tha fo. Kan tih tur leh kan tih loh tur hriat hi pawl zahawmna a ni,” a ti.
NGO-te hi pressure group an nihna hre rana sorkar nawra kawng zawh leh eng emaw hmanga innawr mai han duhte hi a awl tih sawiin chief minister chuan, “Mahse engkim hi dawhkana sawi fel theih an ni deuh zel a. Sawiho hmasak zel mai hi a tha ber thin,” tiin MSU pawhin chu rilru chu an put avangin lawmawm a tih thu a sawi.
Chief minister chuan hun rei tak atang tawh khan MSU hruaitute hian sorkarah zirlaite study tour budget tisang turin an ngen thin chu kumin budget-ah khan sorkar chuan zirlaite study tour budget hi a leta tipungin cheng nuaih za a dah thar ta a. Zirlai tam zawkte study tour-in an kal chhuak thei tawh dawn tih a sawi.
Zirtirtu qualify lote kum hnih vel hun an pek hnuah a la qualify lote an chawl a, tun hnuah chuan qualify-te chauh lak an ni tawh dawn tih sawiin Lalduhoma chuan, “Advertisement chhuah lova hna lak hi India danpui kalh a ni a, kan hun atang hi chuan dan ang thlap zela hna lak kan tum a ni,” tiin, NGO-te chuan monitoring lamah thawhpui tha turin a chah.
Inkhawmah hian khualzahawm, IPR&PS Minister B. Lalchhanzova leh MSU President B. Lalkhawngaihzuala ten thu an sawi a. Chief minister hian Silver Jubilee lungphun a hawn bakah souvenir a tlangzarh bawk.