Aizawl: Mizoram Upa Pawl (MUP) General Assembly vawi 51-na chu nimin khan Vana Pa Hall-ah neih a ni. He hun hi Social Welfare, Women & Child Development Secretary Lalzarmawii’n khualllian niin a hmanpui.
Khuallian Lalzarmawii chuan kum upate chu chhungkua, kohhran leh khawtlang tana an thatlai hun chhung zawng an hman thu sawiin, ram hmasawnna atana an thawh tawhnaah te lawmthu a sawi a. Sorkarin Old Age Pension (Upa Pension) Rs 1,000 laia a tipung thei chu lawmawm a tih thu sawiin, Ministry of Tribal Affairs hnuaia MUP General Headquarters enkawl tur Multi Service Centre Zemabawka sak mek te pawh tihpuitlin vat theih a beisei thu a sawi.
Social Welfare Department hnuaia Ainawn Venga kum upate enkawlna hmun (old age home) tihchangtlun zelna tura hmalak a nih tur thu a sawi a. National Social Assistance Programme (NSAP) hnuaia Old Age Pension Central leh State atanga hmuh tur te chu a theih chin chin tun hnai maia pek chhuah tura hmalak mek a nih thu a sawi bawk.
MUP in sorkar tha taka an lo thawhpui tawhnaah lawmthu sawiin Lalzarmawii chuan, mipui hmasawnna tura thawhhona tha tak an neih zel a beisei thu a sawi a. Khawtlang leh ram nuam zawk an siam theih nan kum upate tana khawvel nuam zawk siam hi mi tin mawhphurhna a nih thu a sawi.
MUP Headquarters chuan kum 2025 bikah mi 10 hnenah kum 100 tlingte chawimawina leh lawmpuina thilpek (Rs 1,000) hlan tawhin, kum 2010 atanga 2025 thleng khan he chawimawina hi mi 236 hnenah a hlan tawh a ni.
Inkhawmpuiah hian MUP member thi ta mi 1,945-te sunna hun hman a ni a. Tun dinhmunah MUP member mi 70,102 awm mekin, Mizoram pawn Jampui Area, Tripura bakah Branch 13 a awm tawh bawk.