Cristiano Ronaldo chuan football khelh nuam la ti hle mah se a vanglai hun erawh a tawp hnai tawh tih a pawm thu a sawi.
Kum 41 mi hian Al Ahli laka Al Nassr-in hnehna pawimawh tak an chan tuma goal a thun hnuah ngun takin a inngaihtuah a, he hnehna hian Saudi Pro League nomawi la turin dinhmun tha takah a siam a ni.
Saudi Arabia-a nomawi lian a lak hmasak ber la thei tur dinhmunah a ding mek a, kumin nipuiah a tawp nan World Cup a khel leh dawn a, a khelh hnuhnun ber a ni dawn a. Hetiang karah hian Ronaldo chuan upatnain a nangching ve dawn tho tih a pawm thiam hle a ni.
“Ka vanglai hun tawp a hnai zel a, inkhelh apiang hi nuam ti takin ka khel ang,” tiin Al Nassr captain chuan a sawi.
Al Ahli laka thiam taka Ronaldo-a’n ball a tauh luh kha tun season-a league-a goal 25 a thunna a ni a, season khata hetiang zat goal a thun tlin theih vawi 15-na a ni der tawh a ni.
“Ka vanglai hun hman hi a ropui hle a, chutiang chuan la kal chhunzawm zel se ka duh a. Nuam ka la ti em em a, goal pawh ka la thun thei reng a ni,” tiin Ronaldo chuan a sawi.
“Mahse, chung zawng zawng aia pawimawh chu chak a ni a. League nomawi lak hi kan châk tak zet a ni,” a ti.
Al Nassr hian point riatin league-ah hma an hruai mek a, pahnihnaa awm, an elpui, Al Hilal chuan vawi khatin an la khel tlem thung.
Ronaldo team hian karleh Thawhlehni hian an elpui berte hi an tum dawn a, hemi hma hian champion an la ni chiang lo a nih chuan he inkhelah hian Saudi Arabia-a league sang nomawi hmasa ber chu a rawn la thei dawn a ni.
“Tun huna mite tan chauh ni loin a hmasate leh la lo kal turte tan pawh ka la inkhel chhunzawm zel a ni a. Ni tin, inkhel tin leh kum tin mai hian nuam ka ti a, ka vanglai hun tawp lam ka hnaih mek lai pawh hian nuam ka la ti reng a ni. Chu chu thu dik a ni,” tiin a sawi.
Manchester United, Real Madrid leh Juvestus forward hlui hi a hun tawp a hnai ve zel.