Aizawl: PHED Minister Prof. Lalnilawma chuan Thawhtanni khan Faina Puitu mobile application a tlangzarh.
E-in-C Meeting Hall, PHED Office-a tlangzarh inkhawmah Faina Puitu app tlangzarh theih a ni chu lawmawm a tih thu sawiin, “Mizoram pawhin khawvel hmasawn rualin ke kan pen ve zel a, hun leh tha save na tha tak a ni,” tiin, bawlhhlawh hi tangkai taka hman theih dan a awm tih a sawi a. Zir bing mite chuan bawlhhlawh atanga rohlu siam theih a nih thu an sawi tih a sawi.
Prof Lalnilawma chuan Supreme Court thuchhuah siam, Solid Waste Management Rules, 2026 dik taka hman a nih theih nan, Aizawl pawnah chuan VC-te nen bawlhhlawh sawngbawl lamah hma lak an tum thu a sawi a, chung atan chuan he application hi a tangkai a rin thu a sawi bawk.
New Education Policy (NEP) hnuaiah graduate attribute (graduate nihphung tur) tehna pawimawh tak pakhat chu faina lam ngaihsak a ni tih sawiin, “Mizote hi a langlo lamah kan fai em tih zawhna inzawh a tul,” tih sawiin, he application hi mi zawng zawng tana hlawkna a nih thu sawiin, a hman dan mipuite inhrilhhriat dan kawng zawn a tul thu a sawi bawk.
He application hmang hian mahni sanitation point a bawlhlawh paih motor thlen chin hriat theihna te, bawlhhlawh paih tur bik hriat theihna te, lungawi lohna thlenna te, mahni in atanga bawlhlawh paih theihna te a awm a. Bawlhhlawh re-cycle theih hralhna te, bawlhhlawh paih kawnga dan leh hrai chhiar theihna te leh mipui tana hriat tur pawimawh en theihna te pawh he application-ah hian a awm bawk.
Faina Puitu hi Android leh Mac-ah download theih niin, kumin chhung (2026) atan man chawi loa hman theih a ni a. Nakum atangin thla tin Rs 10 chawi a ngai tawh dawn a ni.
Tunah hian Aibawk RD Block-ah hman a nih tawh a, AMC huam chhungah erawh hman a la ni lo.