Indian Institute of Engineering Science & Technology (IIEST), Shibpur chuan JEE Exam-a tling lo, 65% mark hmu pha lo, engineer zir duhte tana hmar chhak state leh union territory mite tan Class XII Science-a 40% hmu chin tan pawh zir theih a nih thu an sawi.
Thawhlehni khan Central Seat Allocation Board (CSAB) 2026 bultumin IIEST hotute chuan Aizawl Press Club-a thu thar theh darhtute an kawm a, JEE leh JEE advance pass-te tan IIT leh NIT-ah seat hmuh a awlsam a, chutihrualin he exam-a tling lo tan pawh CSAB leh Joint Seat Allocation Authority (JOSAA) counselling kaltlanga seat hmuh dan a awm a, hetah hian JEE-a tling lo tan CSAB-ah a hranpain form fill-up leh erawh a ngaih thu an sawi.
CSAB hotute chuan JEE leh JEE Advance-a tlingte hian India rama engineering college-a seat awm hi an luah khat zo lo tih an sawi a, heng seat ruak tam tak la awm hi CSAB kaltlang hian NIT, IIEST Shibpur, IIIT leh GFTI eng emaw zatah admission tihsak an nih thin thu an sawi.
Hmarchhak state leh union territory tan CSAB (NEUT) a la awm tih an sawi bawk a, hemi kaltlang phei hi chuan engineer zir duhte tana bituk Class XII Science-a 65% mark hmuh kher pawh a ngai lo va, 40% hmu tling chin tan pawh dil theih a nih thu an sawi.
National Institute of Technology Mizoram Dean (Academics) Sukanta Roy chuan NIT Mizoramah seat 190 an neih thu a sawi a, heng zinga 95-te chu Mizoram zirlaite tan reserve a ni a, stream hrang hrang an neihah 50% seat chu Mizoram atanga Class XII Science pass chin tana reserved zel a nih thu an sawi bawk.