Aizawl: Sport Minister Lalnghinglova Hmar chuan Ministry of Youth Affairs & Sports Secretary Hari Ranjan Rao chu Thawhlehni tlai khan kawmin Mizorama sports hmasawnna tur, a bikin hockey chungchanga hmalak dan a sawipui.
Sports Authority of India Headquarters, New Delhi-a an inkawmnaah Sports Minister Lalnghinglova Hmar chuan Mizote game thiam chi ni si, tun hnaia an khelh tam tawh loh hockey hi India tana international medal lak theihna kawng hnai a ni a, Thenzawla hmeichhe hockey zirna an neih hi an thatpui a, hetiang model hian mipa tana hockey zirna siam an duh thu a sawi a. Empowering Mizoram Sports hnuaia discipline pali – hockey, badminton, archery leh wrestling-ah te SAI Training Centre din belh theih dan ngaihtuah ni se, tiin rawtna a thlen bawk.
Director General of SAI ni bawk, Rao chuan hockey tihhmasawnna kawngah theihtawp chhuah a nih tur thu leh infrastructure awm sa hmang tangkaia a zirna changtlung zawk siam theih dan an lo zir chian tur thu a sawi a, India sorkar pawhin hockey chu a ngaih pawimawh thu a sawi bawk.