Aizawl: Ministry of Jal Shakti, Department of Drinking Water & Sanitation leh Mizoram sorkar chuan Nilaini khan New Delhi-ah Jal Jeevan Mission 2.0 kalpuina tura inremna (Memorandum of Settlement) an ziak.
Mizoram sorkar aiawhin Zodingpuii, Secretary chuan hming a ziah hnan a. Jal Shakti aiawhin Swati Meena Naik, Joint Secretary chuan hming a ziak thung.
MoU ziahna hun hi Delhi atangin Union Minister of Jal Shakti CR Paatil chuan online-in a telpui a. Chief Minister Lalduhoma leh PHE Minister Prof. Lalnilawma te bakah PHE hotuten Aizawl atangin online-in an zawm bawk.
Video kaltlanga Chief Minister chuan thu sawiin, Mizoram chu India rama JJM zaa za tihlawhtling hmasa ber state zinga mi niin, chhungkaw 1,33,060 te chu Functional Tap Water Connection pek an ni tih a sawi a. Thingtlanga school leh Anganwadi Centre zawng zawngte Functional Tap Water Connection kan pe vek tih a sawi.
Chief minister chuan Water Supply Scheme 852 sanction hmuh atangin 849 physical work an thawk zo tawh a. Physical work hi za zela 99 thawk zo tawh ang an ni a. Water Testing Laboratory hi 28 an nei tawh tih a. Chutihrualin, JJM kalpui tawhtea central share, December 2024 atanga la release loh chu a rang lama release turin a ngen nghal.