Aizawl: P&E Minister F. Rodingliana leh Lammual Advisory Committee hotuten Lammual-a 33KV Gas insulated Power Sub-Station dahna tur hmun leh Lammual chhunga hmun pawimawh hrang hrang sak turte power mamawh dan tur leh hrui kaltir dan tur nimin khan an enfiah.
Lammualah hian 33KV Gas Insulated Power Sub-Station Rs vbc 22.36 senga dah tur hi Mizoram sorkar-in sum a pe chhuak tawh a; hei bakah hian Lammual chhunga dah tur hmun pawimawh tak tak, heng — Vana Pa Hall, amphitheater, PHED Reservoir (Litre nuai 12 dawng) bakah Aizawl Square-te power mamawh pekchhawnna tur Rs vbc 9.2 senga siam tur a ni bawk.
He 33kV sub-station hian Aizawl khawpui chawmtu, 33kV Indoor Sub-Station, 33kV Maumual Sub-Station, 33kV Chawnpui Sub-Station leh 33kV Tlangnuam Sub-Station te nasa takin a chhawk zangkhai dawn a, he sub-station hi din fel a nih hunah chuan tam tak lo awm tur atana Aizawl khawpui chhunga power sem chhuahna kawnga mamawhte a phuhruk thei dawn a ni.
He sub-station hmanga Lammual chhunga power hrang hrang pek chhuahna hi lei hnuaia phum tura ruahman a ni. Gas Insulated Sub-Station hi Sub-Station pangngai ang ni lovin hmun a mamawh tlem a, a hmun awh tur hi 34X26 meter bial vel chauh a ni ang.
P&E minister hian Lammual chhunga hmun power pekna tur line ruahman te en kualin a tlawh kual a ni.
Minister hi P&E Commissioner K Lalrinzuali, Jacob Lalawmpuia, UD&PA Director, Er Ngursailova Sailo, E-in-C Deptt leh Lammual Advisory Committee member-te bakah P&E Department Officer-ten an tawiawm a ni.