Aizawl: Lunglei District Jail-a tang eng emaw zat court order lem hmanga chhuah ruk an ni tih hriat chhuah a ni a. He thil hriat chhuah a nih hnu hian Lunglei Police chuan rinhlelh ber mi pahnih manin tang chhuah tawh mi 17 zinga a tam zawk chu an man let leh tawh a ni.
April 27, 2026 khan R. Lalduhawmi, District & Sessions Judge, Lunglei-in FIR a thehluh atanga chhui tan a ni. April 24 khan court-ah Under Trial Prisoner (UTP) pahnih, Malsawmtluanga leh Dokapthanga te chu inlanin, chhuahna tur ‘discharge bond’ leh High Court lehkha te an keng a.
Mahse, Judge hian a hma ni chiah (April 23) khan heng mite hi a hmaa an inlan tawh thu leh an hearing leh hun chu May 8-ah a lo ruat fel diam tawh tih a hriat chhuah tak avangin, jail lamah a kal chilh nghal a. Chhui chianna atangin lehkha dik lo hmanga jail tang (convict) tam tham tak chhuah an lo awm tih hriat chhuah a ni ta a ni.
He thil thleng hi hriat chhuah veleh chhui nghal niin, Police chhui chhunzawmna atangin January 30 leh March 18, 2026 inkar khan document lem hmangin mi 17 an lo chhuah hman tih hriat a ni. Heng mite hi POCSO case, ND&PS leh ruk ruk case-a hremna hmu tawh (convict) te an ni hlawm.
Mi 11 chu man letin jail-ah dah luh leh nghal an ni a. Pakhat a thi tawh a, pakhat Khawzawl Police-in an man bawk a. Police-te chuan a dangte pawh an zawng chhunzawm mek a ni.
He thil titu ber nia hriat mi pahnih chu May 1, 2026 khan man an ni a. Jeremia Lalthangtura (25), Zemabawk, Aizawl, jail-a tang mek (UTP) leh C. Laltlanhlua (31), Republic Vengthlang, Aizawl, Lunglei District Jail-a ambulance driver (muster roll)-a thawkte an ni.
Investigation-in a tar lan danin, Jeremia hian jail tang dangte chu appeal siamsak theih thu hrilhin a lo bum kual a. Mi pakhat hnen atangin Rs 4,000 atanga Rs 50,000 inkar pawisa a laksak thin. An pawisa hmuh zawng zawng hi Rs 1,35,000 vel a ni a, Jeremia leh driver Tlanhlua hian an insem thin tih hriat a ni a. Pawisa hi C. Laltlanhlua kutah emaw a Gpay account-ah a lut thin a. C. Laltlanhlua phone leh banking transaction zawng zawng hi a remtihna thlapin Jeremia Lalthangtura hian jail chhung atangin a hmansak thin a ni.
Jeremia hian Rahsi Venga computer dawr pakhatah leh jail office computer-ah Court order lemte hi a lo siam thin a. Driver Tlanhlua hian office chabi lo dil chhuakin a lo venpui thin a ni. Document lemte hi jail thuneitute hnenah pein, thuneitu lam hian a lem tih hre lovin tangte hi an lo chhuah mai thin a ni.
Hmanrua (computer leh printer)-te chu police-in an man tawh a, Forensic Science Laboratory-ah enfiah turin thawn a ni a. Lunglei Police-te chuan uluk takin an la chhui chhunzawm zel a ni.