Tamil Nadu-ah chuan Tamilaga Vettri Kazhagam (TVK) dintu, C. Joseph Vijay chu Pathianni chawhma khan chief minister atan lak luh a ni ta.
Chawhma dar 10:00-ah Chennai-a Nehru Indoor Stadium-ah Governor Rajendra Vishwanath Arlekar-a chuan Vijay-a hi rinawmna thu tiamtirin a la lut a. A rual hian minister tur pakua pawh rinawmna thu tiamtira lak luh an ni bawk.
Tamil Nadu tangrual sorkar thara cabinet minister atana lak luhte zingah hian KG Arunraj, Aadhav Arjuna, N Anand, Selvi S Keerthana leh Dr TK Prabhu te an tel a. Inkhawmah hian Congress hruaitu, Rahul Gandhi-a leh Tamil film industry-a mi hriat hlawh eng emaw zat an tel.
Vijay-a hian Congress, CPI, CPI(M), VCK leh IUML te puihnain member 234 awmna rorelna inah MLA thlan thar 120-te thlawpna a nei thei a. Kum 1967 hnua DMK emaw, AIADMK emaw tel lova an state-a chief minister hmasa ber a ni ta a ni.
Lok Bhavan thuchhuahin a tar lan danin governor chuan Vijay-a hi Nilaini emaw, a hmain assembly-ah a sorkarin rin a hlawh leh hlawh loh buk turin a hriattir.
Tamil Nadu chief minister, TVK hruaitu, thutiam a lak hnuah chief minister pisa awmna, Fort St. George pan nghalin a thuneihna puan chhuahna file-ah a hming a ziak a. Thu a tiam hnua thu a sawinaah Vijay-a chuan mipuite chu a sorkar chungchangah inrintawkna nei reng turin a ngen a, mi zawng zawng tana rorelna mumal leh felfai tak a siam theih tur thu a sawi.
Secretariat-a thu tiam a ni tih puan chhuahna file-ah hian chief minister chuan chhungkaw tinte hnena power unit 200 a thlawna pek theihna tur a ziak nghal a, hmeichhiate himna tur special unit din leh ruihhlo tawlhrukna buaipuitu tur special unit dinna tur a tifel nghal bawk.
Thawhtanni hian assembly session koh a ni dawn a, hetah hian MLA thlan tharte rinawmna thu tiamtira lak luhna an ni ang a. Sholavandan bial atanga thlan tlin, Karuppaiah chu pro tempore speaker atan ruat a ni.
Ani hian MLA tharte chu rinawmna thu a tiamtir ang a, MLA thlan tlin zawng zawngte rinawmna thu tiam a siam hnuah speaker nghet thlanna chu a buaipui ang a. Sorkar thutiam thar hian Nilaini emaw, a hma emaw hian rintawk a hlawh tih a finfiah a ngai dawn a ni.