Pakistan chhimthlanga police post-a car bomb puak leh inkah zuina nasa tak thlengah officer 12 an thi niin police leh venhimna thuneituten an sawi.
He thil hi Inrinni tlai tawh taka Afghanistan nena an inrina, Khyber Pakhtunkhwa province-a Bannu district-a thleng a ni.
Hel pawl tangrual, Ittehad-ul-Mujahideen Pakistan tia hriat chuan an tihah an chhal.
Police hotu, Zahid Khan-a’n The Associated Press news agency hnenah mahni intihhlum tumtu leh fighter eng emaw zatin security post bulah puak thei phur lirthei an tipuak niin a hrilh a. A hnuah puak dang tam tak hriat a ni a, security post hi a chim chhe vek niin a sawi bawk.
Inrinnia pawikhawihna thlen hnua thlalak atang chuan police post hi a chhe hle a, leirawhchan, bungrua leh lirthei chhe tawhte a darh nasa hle.
Reuters news agency chuan venhim hnathawktuten thuchhuah an siamah bomb a puak hnua pui tura police-te kalte chu lambun an ni leh bawk tih a tar lang.
Police hotu pakhat, a hming tar lan duh loh chuan Reuters hnenah silai kengte hian puak thei phur car hmangin post chhungah an tlan a, pisaah lutin officer-te an kap niin a sawi.
“Dan kengkawhtu dangte chu police-te pui turin tirh an ni a; mahse, firfiakte hian an bei a, mi thenkhatin hliam an tuar,” a ti.
Police thuchhuah chuan pawikhawihtute hian drone hmangin pawikhawihna hi an hmang bawk niin an sawi.
Police hotu, Sajjad Khan-a chuan Reuters hnenah thi an la awm belh a hlauhthawnawm thu a hrilh a. Inbeihna a la awm tih sawiin beihpui thlak zawhah chauh chhiat thlen dan hriat theih a nih tur thu a sawi.
Pakistan-a Dawn chanchinbu chuan bomb puak vang hian a bul hnaia civil mite pawhin chhiatna an tawk niin a tar lang a, civil mi pahnih an hliam.
Chhanchhuah hna thawktue leh ambulance tirh an ni a, thuneitute chuan Bannu-a sorkar damdawi inah emergency puan a nih thu an sawi.
Kum tam tak chhunga Pakistan leh Afghanistan inkara indona nasa ber chu February thla khan a thleng a. Tun hma lama tang dun thin inkara indonaah hian Afghanistan chinah Pakistan-in thlawhna hmangin a bei a, Islamabad chuan firfiakte hmun beih a nih thu a sawi.
Inbeihna hi reh daih tawh mah se ramri-ah inkahna a lo chhuak fo va, inkahhai puan pawh a la awm lo.
Islamabad chuan Kabul chu Pakistan beitu firfiak pawlte khawituah a puh a. Taliban sorkar chuan phain Pakistan-a ralthuam cheleka helna chu an ram chhung buaina a nih thu a sawi.
Pakistan Taliban, Tehrik-e-Taliban Pakistan tia hriat bawk leh an thawhpui hel pawlte chuan tun hmain hetiang hian an lo bei tawh a. Pakistan Taliban hi pawl hran ni mah se Afghanistan-a kum 2021 atanga thuneihna chang, Taliban nen inzawma ngaih an ni.