Aizawl: Food, Civil Supplies & Consumer Affairs (FCS&CA) Department chuan kumin fur chhung atana Monsoon Stocking (buhfai chhekkhawl lawkna) hna chu hlawhtling taka zawh a nih thu a sawi.
Nilainia an thuchhuahah Supply department chuan, kum tina department-in a lo tih thin angin, fur khawchhiat laia kawng chhia leh leimin vanga tlawhpawh harsatna thin khuate tan hma lak a ni a. Thingtlang hmun kilkhawr zawka cheng mipuiten furpui lian a lo thlen pawha buhfai harsatna an tawh loh nan he hmalakna hi kalpui a nih thu a tar lang.
An tar lan danin, khua hrang hranga Supply Centre 70-ah buhfai hi thlen vek a nih tawh thu leh buhfai quintal 1,66,655.90 (nuai khat, singruk, sangruk, zaruk sawmnga panga leh kg 90) zet chhekkhawl a ni tawh.
FCS&CA Department chuan furpui lo thleng mah se buhfai lamah harsatna a awm dawn lo tih a tar lang a. Supply centre hrang hrangah hian an mamawh tur zat thlen kim vek a nih tawh avangin hlauthawn tur a awm lo tih mipui a hriattir a ni.