Aizawl: Manipur-a Zohnahthlak Pastor pathum nunna laksak an ni chu Mizo National Front (MNF) chuan pawi an tih thu leh an sun tak zet tih an sawi.
Nilaini khan Churachandpur atanga Kangpokpi pana kal, Thadou Baptist Association (TBA) hruaitute chu motor pahnihin an chuang a. Kangpokpi District an luh hnu, Kotzim leh Kotlen khaw inkarah vanduaina hi tawkin kahhlum an ni.
He inkahnaah hian pastor pathum Rev. Dr. Vumthang Sitlhou, Rev. Kaigoulun Lhouvum leh Rev. Paogoulen Sitlhou te’n nunna an chan a, mi dang paliin hliam an tuar bawk.
MNF chuan he thihna hi thinlung takin an sun thu leh, pawikhawihtuten an phu tawk hremna an hmuh ngei an beisei thu an sawi a. Manipur-a boruak muanawm a awm chhoh mek laia hetiang thil duhawm lo a thleng leh hian rilru a tihnat thu tar langin, hliam tuarte pawh dam chhuak leh ngei turin duhsakna an hlan bawk.
Manipur-ah Zohnahthlakte inkarah leh hnam hrang hrang inkarah remna tluantling awm se, tih chu MNF duh dan a nih thu an tar lang bawk.