Aizawl: Ministry of DoNER hnuaia Rs. vbc 189.78 senga kalpui tur, Mizoram Ginger Unique Selling Proposition (USP) – Sustainable Cultivation & Value Chain Development Project chu Chief Minister Lalduhoma leh DoNER Minister Jyotiraditya Scindia ten online kaltlangin Nilaini khan an hawng.
A hawnna hun hi CM Office-ah Horticulture Minister C. Lalsawivunga, Adviser to CM Dr. KC Lalmalsawmzauva, Chief Secretary Khilli Ram Meena leh Mizoram sorkar official ten an hmang a. DoNER Minister Jyotiraditya Scindia chuan Delhi atangin a tel a, Champhai District-a sawhthing chingtute pawhin online-in an zawm ve bawk.
Chief Minister Lalduhoma chuan Mizoram sawhthing chu Unique Selling Proposition (USP) atana pawm a nih tak avanga he project lian tham tak hi Mizoramin a hmuh theih thu a sawi a. Mizoramin sawhthing chi thum a chin thin zingah, Thingpui leh Thinglaidum te chuan kum 2021 khan GI Tag a hmu a, kum 2025 khan chemicals residue endikna (Eurofin Analytical Services) Bengaluru lamin an neih chu tha takin a paltlang tawh a. Tun hnaiah Unique Selling Proposition atan thlan a lo ni leh ta tih a sawi.
Sawhthing chu hmanlai atanga pi leh pute lo chin tawh thin thlai, vawiin thlenga Cash Crop an chin uar ber zinga mi, Mizote nuna bet tlat a nih thu sawiin chief minister chuan, “A quality a tha bik a, a rim a tui a, medicinal value a nei a, a fibre neih a tlem a, oleoresin leh essential oil a ngah a. A danglam bik a ni,” a ti.
Chief minister sawi danin, he project hi convergence-a kalpui tur a ni a, a processing bik chu NEC (Focused Development Component) atanga sum hmuh Rs. vbc 30.13 hmanga kalpui a ni ang a. Sawhthing thar tamna Champhai District (Mualkawi)-ah a processing hub bulpui ber din a ni ang a. Mualkawi hub chawmtu tur hian Tualcheng, Vaphai, leh Zotlang-ah unit tenau deuh zawk dah a ni ang.
DoNER Minister Jyotiraditya Scindia chuan Prime Minister hmathlir angin loneitute tihhmasawn chu India hmasawnna ke chheh pawimawh a nih thu a sawi a. He project hmang hian Mizoram sawhthing tha danglam tak chu khawvel hriat tura pho chhuah a nih tur thu a sawi.
Hna hi kumin 2026 chhunga thawh zawh hman tum a ni a, nakkum 2027 atanga a processing hna hi kalpui tan tum a ni.