Aizawl: Mizorama Science lama tlawmngai pawl upa ber, Mizoram Science Society (MSS) chuan Nilaini khan ‘Mizoram Science Award’ hmasa ber chu Dr. L.N. Tluanga, Mission Veng hnenah a hlan. He chawimawina hi Dr. L.N. Tluanga taksa a chak loh deuh avangin MSS hruaituten Aizawl Hospital-ah an hlan a ni.
He Award hi Mizoram Science Society chuan Mizote zinga Science leh a kaihhnawih lama hnuhma nei tha, khawtlang leh ram tana thawhhlawk leh scientific research lama hmingtha te chawimawna hlan thin turin a duan thar a ni. A dawng hmasa ber Dr. L.N. Tluanga hnenah hian chawimawina thuziak leh tangkafai Rs 50,000 hlan a ni.
Dr. L.N. Tluanga hi kum 1933-ah Bukpui khuaah lo piangin, Gauhati University hnuaiah kum 1974 khan PhD a zo a. Mizo zinga Mathematics subject-a PhD nei hmasa ber a ni.
Mizoram sorkar hnuaia Education Director hmasa ber a ni a, Education Department-ah Consultant leh Adviser hnate pawh a chelh thin. MSS pawh hi ama hova kum 1979-a din a ni.