AH&Vety Minister C Lalsawivunga chuan Mega Egg Production Project kaltlangin thla tin artui 70,000 thar chhuah tum a nih thu a sawi.
Nilaini khan AH&Vety Rest House, Selesih-ah Mizoram Veterinary Service Association (MVSA) chuan an Annual General Conference vawi 44-na an hmang a. He hun hi AH&Vety minister chuan khuallian niin a hmanpui a. AH&Vety Department chu Mizoram economy innghahna bulpui pawimawh tak a nih thu a sawi.
Minister chuan Thenzawlah Mega Egg Production Project kalpui mek a ni a. He project hian arpui nuai khat vulhin thla tin artui 70,000 thar chhuah a tum a nih thu a sawi a. ASF avanga vawk nasa taka an chân hnuah February 10, 2026 atang khan National Livestock Mission hnuaiah rante insurance kalpui tan a ni a. India rama insurance nei tha ber an nih thu leh ranvulhtuten an hlawkpui hle thu a sawi.
Bawng population a tlahniam mek chu pawi tiin, ran chaw hnianghnar zawk a awm theih nan Department chuan hmun hrang hrangah ram enin fodder chinna tur hma a la mek tih a sawi bawk.
Minister chuan department-a thawk tute chu ranvulhtute harsatna sutkianpui turin an ina kalchilh thin tur leh, an rante an insure ngei nan hma laksak turin a chah bawk.