Narcotics Control Bureau (NCB) chuan hun eng emaw chen chhui zuia an enthlak hnuah Myanmar-a ruihhlo tawlh thin hotu lian zinga mi, Thancintuang @ Chintuang @ Tluanga chu Inrinni khan Delhi-ah an man.
Chintuang-a hi Myanmar, Mizoram, Manipur, Assam, leh Tripura thlenga ruihhlo phurh kualna kawngkapui thununtu lian ber pakhata ngaih a ni a, Myanmar atanga ram chhung leh ram pawn hmun hrang hranga ruihhlo chi khat, methamphetamine leh heroin sem chhuaktu ber a nih avangin NCB leh sorkar hnuaia ruihhlo laka hma la thin pawl hrang hrangte chuan an lo zawng tawh thin a ni.
Chintuang-a hian ruihhlo Rs vbc 115 chuang hu tawlh luhnaah inhnamhnawihna a nei a, Mizoramah kum 2025 khan Champhai Police-in methamphetamine leh heroin kaihhnawihah case pahnih lo siamsak tawhin, kum 2023 pawh khan Mizoram Excise & Narcotics Department chuan heroin tawlhna kaihhnawihah case paruk an lo siamsak tawh bawk.
Tripura leh Assam-ah pawh kum 2024-ah NCB Agartala Zone-in methamphetamine 14 kg leh heroin 2.8 kg an mannaa an mi thurualpui hotu ber a ni a, kumina methamphetamine tablet 49.1 kg lai an mannaah pawh khan a khaipa ber a lo ni tawh bawk.
He ruihhlo network lian tak man chhuahna kawngah hian NCB chuan Chintuang-a hotu dang leh a thurualpui hnaivai tak takte pawh an man phah a, chung zinga mi Vungkhanthawna chu Chintuang-a thurualpui ringtlak ber tura ngaih niin ruihhlo phurh kual leh a hmun tur hriattirna lam zawng zawng lo khawih thintu a ni a, ani pawh hi Mizoram Police-in case an lo siamsak tawh thin avangin PITNDPS Act hnuaiah khauh taka hren zui a ni.
A thurualpui dang, Lalrampari pawh ruihhlo an zawrh atanga sum tling khawmte chu dan phal loh hawala channel hmanga lo thawn kual thintu a nih avangin NCB chuan August, 2024 khan lo man tawhin chhui chiannaah Rs vbc 100 chuang zeta ruihhlo sum an lo thup kual tawh tih hriat a ni a, he hma lakna hi Enforcement Directorate (ED)-ah hriattir zui niin ruihlo sum hmanga in leh lo an neihte pawh sorkar chuan a hrensak nghal vek a, Assam leh Tripura-a ruihhlo lo phur kual leh lo sem darh thintu, Abu Saleh @ Saifuddin leh Jabrul te pawh ruihhlo tam tak nena man an ni bawk.
NCB hian kuminah ringawt pawh hian ruihhlo kaihhnawihah case 31 an ziak lut tawh a, mi 54 zet manin Chintuang-a manna hi kumin chhunga Myanmar lam ruihhlo supply-tu lian an man pahnihna a ni.